Kohima DDMA 2018 atema mezüng senden menogo

Dimapur, Rongchii 17 (TYO): Deputy Commissioner aser DDMA mendenpuba, Rajesh Soundararajan IAS lenisüba kübok DPDB indang Conference Hall nung Rongchii (April) 16, 2018 nü District Disaster Management Authority indang first quarterly senden menogo.
Taoba senden nung renema aliba osang agitepba mapang DDMA mendenpubai IDRN indang jembi. IDRN ya online inventory ka lir, koba nungi department balala indang inyakyim aser osang agizükteter. IDRN ya maneni update asütsüla anungji department tem ajanga kasa osang ya standard format nung yanglur iba ita tsüngta sa agütsütsüla, ta pai ashi.
Tzüngluruwa nung renema alitsü atema jembishinüba mapang DC-i department tem dang timtem ajuruba nungi kümzüktsü asoshi renema alitsü mepeshi.
Soul Harvest Church anasa teyanglushitsü aliba indang jembidang pai, concerned department-i tekeraba nung mapa inyaktsüla, kechiaser iba ajanga yimti nung tesem aisü nung mejungi kongshir aser nüngdak dang süra Power department aser SP’s Office, Kohima ajanga metetdaktsüba ama tanga department nungia nübu aser lenmang balala nungi teyari meshitsü, ta ashi.
VDMA indang onük jembiba mapang Nodal Officer & ADC, T. L. Kiusumong-i maparen balala inyakba atema pelaba lemsatep aser administrative officer tem dang pei tata tesemtem nung mapa tekeraba nung inyaka aotsü ajungshi.
Mapang kasa nung VDMA tenzüktzü asoshi District Administration ajanga Sub-Division ajunga dangi zülutsü, ta DC-i metetdaktsü.
NEPEX 2018 atema jembiba mapang, Rongchii (April) 28, 2018 nü Mega Mock Drill agitsü, kong teshiemtet tesem kar nung menoknok anokba mapang teinyaktsü mapatem angazükdaktsütsü, ta DC-i metetdaktsü. Iba sentong asoshi Rongchii 23 aser 25 nung senden ka amentsü, anungji züngsem ajangi iba anogo atema sentong renemtsüla, ta ashi.
Nagaland Emergency Preparedness Exercise (NEPEX) ya state ajanga ayongzükba sentong ka lir, koba taoba küm tenzük aser NDMA exercise dak alaka state tesem ajunga nung inyakba bo India nung Nagaland state mezüngbuba liasü, ta kasa senden nung District Disaster Management Officer, Kohima, Thejangulie Zao-i metetdaktsü.
Taküm mock drill exercise agitsü atema tesem kar Rongchii 25 nung shimtettsü, ta Zao-i metetdaktsü.