Sorkari sen 500 punguben agi teimba menüngtsü

New Delhi, Rongchii (April) 17 (Agencies): Linük kübok tesem balala nung ATMs (Automated Teller Machines) nung sen maliba khuret ka ajurua aliba mapang ka nung Sangtennü (Mongulbar) Centre-i sen 500 pungusü agi teimba menüngtsü ta osang metetdaktsüogo.
“Onoki anogo ka nung sen 500 note crore 500 shi menünger. Onoki iba ya punguben agi teimba menüngtsü atema mapa tenzükogo. Taruba anogo ana tsüngda, sen 500 note crore 2,500 shi menüngtsü. Ita ka nung crore 70,000-75,000 shi menüngtettsü” ta Department of Economic Affairs Secretary, S C Garg-i ashi.
Tentonü (Hombar) Maharashtra, Bihar aser Gujarat nung sen peria manguba isang osangtem prokshi aser iba ya Andhra Pradesh aser Telangana nung aliba ATMs nung sen manguba sülen ita ka shi atalok.
Sangtennü (Mongulbar) anepdanga tesem kar nungi sen manguba osang metetdakja liasü aser iba sülen Finance Minister-i osang ka metetdaktsü.
Sen peria dang lir aser bank tem nunga peria dang yua lir. Linük kübok tesem kar nung kanga dang ajungbena sen agizükba ajanga iba khuret ya ajuru, ta Finance Minister Arun Jaitley-i ashi.