Delhi sorkar nung advisor 9 anentsür

New Delhi, Rongchii (April) 17 (Agencies): Delhi sorkar indang General Administration Department-i Sangtennü (Mongulbar) Delhi sorkar nung advisor 9 mapa nungi anentsüogo.
Union home ministry-i tuyuba nung ajemdaker parnoki iba mapa inyak ta GAD-i metetdaktsü.
Rongchii (April) 10 nü MHA-i GAD dangi shidi ka züluba nung Centre sorkari advisor 9 shimtsü atema temelaba kecha magütsü ta shia liasü.
MHA-i tetuyuba agütsüba nung advisor 9 ji ‘approved posts’ nung dena mali ta shia lir, ta GAD-i Sangtennü (Mongulbar) metetdaktsü.
Iba tetuyuba nung GAD Deputy Secretary, Promila Mitra-i sign süa lir aser osangbenertemi la dang osang tejangja metetnüa asüngdang saka lai iba onük atema jembitsü temelaba agüja mali ta langzü.
Advisor 9 ji Amardeep Tiwari (media advisor to law minister), Arunodya Prakash (media advisor to deputy chief minister), Raghav Chadha (advisor to finance minister), Atishi Marlena (media advisor to deputy chief minister), Prashant Saxena (consultant in the office of power minister), Ram Kumar Jha (logistics in office of GAD minister), Brig Dinkar Adeeb (OSD to power minister), Sameer Malhotra (consultant in office of power minister aser Rajat Tiwari (Aide-de-camp, office of power minister) nungertem lir.
MHA-i agütsüba shidiji Monupii (May) 21, 2015 nung züluba lir aser iba nung “services” ta asübaji Linük Temzüng nung aliba ama centre sorkar atema mekazüka yutsür ta shia lir.
“Anungji, Delhi Cabinet-i item nisungtem shimokbaji ozüngi memelar. Item mapa adokdaktsüba aser nisungtem shimokbaji ozüngi memelar asü nung, taoba mapang mapatem adokdaktsüba aser nübo shimokba ajak agiener” ta GAD-i metetdaktsü.
“Modi sorkari Delhi sorkar advisor tem mapa nungi anentsübaji Delhi nung temelenshi bener aruba mapa anendaktsütsü atema tasa ka lir” ta Deputy Chief Minister Manish Sisodia-i ashi.