PDA züngsemtem & sorkar mapa inyakertemi ‘Tongti Tesemdanger’ shilem magitsü

Dimapur, Rongchii (April) 17 (TYO): Rongchii (April) 16, 2018 nü PDA Cabinet senden amendang Nagaland nung VIP inyaksangshi agientsü aser arem shiruru kümzüka ayutsü indang onüktem benoka lemsatep.
VIP inyaksangshi agientsü atema inyakba nung ajemdaker PDA züngsemtemi Tongti Tesemdanger ama sentongtem nung madentsü telemtetba agi. Iba denji külemi sentong balala nung adendang parnoki tenla magütsütsü aser senotsü teyari agütsütsü indang osang mesangdongtsü atema tanü Cabinet senden nung bangzünga renem.
PDA züngsemtemi public sentongtem nungbo adentsü aser o jembitsü saka iba mapang state aser centre sorkartem indang osangtem jembiba dak alaka senotsü teyari mesüra tenla agütsütsü indang mejembitsü.
Maneni, state sorkar ketdangsertem aser mapa inyakertemia Tongti Tesemdanger ama sentongtem nung shilem magitsü aser senotsü teyari magütsütsü, kechiyong ibaji service rules alema lir, ta Cabinet-isa lemtet.
Sorkar ketdangsertemi sentongtem nung Tongti Tesemdanger ama mesüi shisalen sayurtem amabo adentsü aser idangji sorkar dak sendakba osangtem jembitsü akok. Ajisüaka, state adena orr aliba lennirtem aser ketdangsertembo iba tenokdangba kübok maittsü, ta PDA cabinet-i tanü telemtetba agi.
Public sentongtem nung PDA züngsemtemi sempettem magizüktsü aser iba ama sentongtem nung naro aser narojung nunger ama sempet atema amshitsü akok ta parnokisa lemtet.
PDA sorkar aser sorkar mapa inyakertemi arem shirurutem, süngdonglidong aser angotem kümzüka aser wazüka ayutsü atema mapa inyaktsü. Iba dak sendakba nung sentongtem nung arem shiruru aser arem nung anguba chiyungtsütem kecha magizüktsü aser machitsü ta cabinet-isa telemtetba agi.