NPMCC-i ‘Justice for Asifa’ sentong ayonga agi

NPMCC aser DDMCC ketdangsertem den züngsemtemi tezülubatem amer lungkak aitba noksa angur.

Dimapur, Rongchii (April) 17 (TYO): Unnao aser Kathua nung tetsürtem dak tashiyim mapa inyakba ken o tem dena India nung BJP-i ozüng alema mapa inyakba nung shilem agiba anema All India Mahila Congress (AIMC) den külemi NPMCC-ia Sangtennü (Mongulbar) lungkak aitba sentong ka ayonga agi.
Dimapur DCC complex nung ayonga agiba sentong nung Nagaland Pradesh Mahila Congress Committee (NPMCC) President, Mrs. N. Lucy-i o jembidang, linük nung tetsürtem aser tanurtem kümzüka mayuba anema Black Day amunger, ta ashi.
BJP-ia shilem agiba ajanga linük nung tetsür aser tanurtem dak tashiyim mapa inyakba kanga bulua ataloker. Tanü ‘Justice for Asifa’ ta ser sentong agir saka kasa tia ya tetsür mesüra tanur mashii kati ajurutsü akok, kechiyong BJP-i takoksa angur nem temeten agütsütsü atema mapa kecha meinyaker, ta N. Lucy-isa metetdaktsü.
BJP lennirtemibo tai tonglokja alirtem kümzüktsü merang aser Linük Wako amer parnok pusem saka public-i ola adokba ajanga tai tongloktsürtem aputsüsa aküm. Iba ama inyakyim anema sensotemi ola adoktsüla aser linük nung tetsür aser tanurtem sadoksadoka alitsüsa tensa tanaben arutsü atema merangdi, ta laisa ayongzük.
Sentong nung Dimapur District Mahila Congress Committee Working President, Mrs. Tiala Sapu-ia o jembidang, tanü media nung iba ama osangtem tasüng adoker saka ano tatalokba aika temai madoki sang süidaktsür, ta ashi.
Tetsür taintem dak dang masü saka tila tanurtem dak-a taochi melii mapa tamajung inyaker. Tatalokba balala nung takoksa ajururtem aser parnok kibongtem pusema iba Black Day amunger, ta Tiala Sapu-isa ashi.
Iba sentong ya yimtenren indang sentong ka masü saka meimchir tangatetba nung ajemdaker agiba sentong ka lir. Linük nung tetsürtem aser tanurtem anema mapa tamajung inyakba magizüker aser süoki ia bilemer ta sayutsü atema iba sentong agir, ta laisa shisem.
Tatem nung Area Mahila Congress, Dimapur -I President, Mrs. R. Lotha-i sarasadema sentongji tembang.