Tongti tesemdanger masü…

Nagaland nung tawa People’s Democratic Alliance (PDA) government kümer külen maparen aisü nung temelenshi bener arutsü merangba angur. Mezüngbubaji, yimsüsürtemi nübortem dang nungi kanga agia temaba jenjang nung ali ama peisasa pei ulua bilemba sobaliba aser shisatsü melenshitsü asoshi yimsüsürtem gari nung pei mapa tenüng zülur mesenzütsü telemtetba agiogo. Iba denji külemi ano yimsüsürtem meina sepai gari talila anidaka mesenzütsü asoshia telemtetba agiogo. Iba kisüng jagi yimsüsürtem ajemaludaktsüba dang masü saka government meyong senotsüa aika kümzüktsü. India nungsa süaka Nagaland nung balaka nisung ka kodang election nung adoka yimsüsür kümdir, kenyongi balaka asükümadoker. Iba jagi pei vote agi adokdaktsüba yimsüsür nübortemi majurutepteter. Joko yimsüsür kümra tetsüng agi mera kata maotsü, anü kenyongi mepuloktsü, tsünglu majaloktsü aser nübortem den kenyongi meyoktepa tamena külemi mamentsü. Iba amaji Naga nunger yimsüsürbo peisasa pei dang tuluba küma ngasangatemtsü tenzüker. Iba jagi yimsüsürtemi nübortem bushia oa yaritsü melen nübortem anasaia marudaktsüner. Aji oda, peisasa pei Kanga Tongtibang Nisung (VIP) akümnungji, sensaker aser tilartem denbo ajurutepla masü ka kümadoker. Tanü asen lima nung nübortem timtem tenzükbaji yang nung jagi tenzüker. Nübortemi yimsüsür shimbaji nisung ka kanga tongtibang nisung ama bilema asüküma senzüdaktsütsü asoshi masü saka nübortem tenzükdaktsütsü asoshi shimer. Ajisüaka, yimsüsüri nübortem tenzüktsü melen nübortemiang yimsüsürtemji tsüngrem ama bilema tenzüker. Iba jagi nübortem mulungba nung masü saka yimsüsürtemi mulungba nung yimsü asür. Ibayongji, yimsüsürtem takarba akümdang nübortem sensakba akümer. Iba ama tia ka nung yimsüsürtemi peisasa kanga ulua bilemer aser ano külen nübortemi peisasa kanga ilaa bilemer.Aji oda, nübortemi yimsüsür dang nungi tenla tilaka memeshiibo sentong tilakata ayongzüka mekatettsüsaba sensak jenjang ka nung yimsüsürtemi nübortem yuja lir. Iba jagi benjongbentsü aser lokti sentong ajunga nung yimsüsür dang nungi tenla tajung imlaa tongti tesemdanger südaktsür. Atangji, asenoki yangluba sentong tajung ka nung tongtibang nisung ka tongti tesemdanger süa jaokbaji junger, kechiyong ibaji nisungi nisung nem akümtsübu agüja züngshiba mapa ka lir. Ajisüaka, asenoki tongti tesemdanger jaokba nükjidongjibo aji masü saka senotsü tenla tuluka imlar. Iba jagi akhidang jungtepa aruba otsü mesüra tarutsü nunga putepa aotsüba nükjidong nung shisa tajung ka lemsateptsü imlaa jaoker masü saka sen aginüba agi takar aser tekuru maliba nisung bushia tongti tesemdanger südaktsür. Iba ama yimten nung sobaliba tamajung anendaktsütsü asoshi tang nungi government nung alir yimsüsür aser ketdangser shinga tongti tesemdanger süa shilem magitsü aser sempettsüpeta magizüktsü ta PDA government-i lemtetbaji junga lemtetogo. Iba jagi asenok loktiliba nung temelenshi tajung adoktsü imlar. Iba denji ano yimsüsür aser ketdangsertem asoshi chiyongtsü renemtsü dang arem shi aser ango mamshitsü lemtetba jagi arem shiruru aser ayong nung ango aika kümzüktsü. Item mapatem ya telemtetba agitsübo temela saka mapa küma aotsü tasak, kechiyong mapa küma aotsü asoshi tangatetba tulu alitsü nüngdaker. Tangatetba melira,  nübortemi lokti senden alitsü atema yimsüsürtem dang angati tenla tulu meshipet meshitsü aser yimsüsürtemia tongti tesemdangersa mejaokra mepelatsü. Iba kasa tangatetbaji melira yimsüsüri anir arem shiruru shi bushitsü aser ayong nung mozü amshia ango apuba mapa nungang pelatsü. Asen lima tajungba küma melenshidi süra yimsüsürtemi anir tulu tilar ajak ajemalutsüla. Atangji, asenok rongnungbo tongti tesemdanger masü saka nübortem yariba mapa nung yimsüsürji tongti shilem agirang ka asütsüla.