Assam bill anema lokti 16-i nokdak

Guwahati, Rongchii 18 (Agencies): Assam nung lispour lokti tentet aika densema lokti tentet 16-i Citizenship (Amendment) Bill, 2016, iba bill asadangtsü asoshi kümtetba joint parliamentary committee kati New Delhi nung Sangtennü angadangba anemogo.
All Assam Minorities Students Union (AAMSU)-i iba committee ajanga Assam semdanga iba bill dak sendakba nung idakji aliba nüburtem tebilemba angadangtsü asoshi khanga iba sentong ya magizük.
Lokit 16-i sangdong ka ajanga ashiba agi, parnoki iba committee mendenbuba Rajendra Agrawal aser züngsemtem ajuruogo aser parnok dang Assam nung aliba nüburtemi kodanga ‘secularism’ dak kongshiba iba amala bill ya magizüktsü, ta shiogo. Parnokisa ozüng alema bendanger arua alirtem ya parnok tamangba yimsü dak ajemdaker mebendangtsüla, ta ashi.
Iba bill ajanga Muslim tamangba yimsü dak amangertem dak alaka Afghanistan, Pakistan aser Bangladesh nungi arua alirtem India nung Küm trok aliba sülen lisopur jenjang agütsütsüba benoka lir.
Iba bill anemba lokti tentettem rongnung All Assam Tribal Sangha, All Bodo Students’ Union, All Rabha Students’ Union, All Mising Students’ Union, All Tiwa Students’ Union, All Dimasa Students’ Union, All Moran Students’ Union, All Assam Gorkha Students’ Union, All Assam Karbi Students’ Association aser All Assam Tribal Youth League densema lir.
Parnoki ashiba agi, Assam Accord nung mulungtepba ama 1971 Metsüremi (March) 25 matong tsüngda ozüng alema bendanger aita alirtem khuret Assam-i benogo aser parnoki joko iba khuret ya ojang dang abentsü.
All Assam Students’ Union, AGP aser KMSS amala lokti tentettemia iba bill anemogo. Assam sorkar kümtetba nung BJP den lokteper aliba telok AGP puri Centre-i iba bill ya agizükra parnok sorkar menden toktsütsüba amokmerenogo.