PM Modi-i pai jembiba ama inyaktsüla: Manmohan Singh

New Delhi, Rongchii 18 (Agencies): Kathua nung arishi küm 8 tetsür chanu ka dak tashiyim mapa inyaker tepseta toktsüba aser Unnao nung Bharatiya Janata Party (BJP) MLA, Kuldeep Singh Sengar-i arishi küm 18 tetsür ka dak tashiyim inyakba sülen linük nung aikati item tatalokba aitsüba mapang ka nung taoba Ato kilonser, Manmohan Singh-i item onük nung Ato kilonser, Narendra Modi-i mapang talangka ola madoki aruba atema aitsüogo.
Taoba Ato kilonser, Singh-i Ato kilonser, Modi dang, “Modi-i kü dang sayutsüngiba ama pai inyaka o jembitsüla,” ta ashi.
Taoba UPA sorkar mapang nung BJP-i 2G ochimashi ken o nung Manmohan Singh-i ola madokba atema aija liasü. Iba mapang nungji tang teinyakdak BJP minister temi Singh dang ‘Maun-Mohan Singh’ jaa liasü.
Tanü osangbener den jembidang Manmohan Singh-i, “Ato kilonseri kü dang sayutsüngiba ama inyaka aiben jembitsüla. Osangbenertem ajanga angazükba agi, ni o mejembiba atema pai (Modi) ni aijasa jembiogo,” ta ashi.
Ajisüaka Singh-i, aji oda süaka tatemsabo Modi-i jembiba atema pelar, ta ashi.
Singh-isa, sorkar tashi nung alirtemi mapang shidak nung jembitsüla, ibaji ajanga dang nüburtemi parnok dak tamang katettsü, ta ashi.
Taoba mapang Nirbhaya tashiyim amshia raksatsür tepsetba dak sendakba nung Singh-i, tetsürtem anema inyakba mapatem nokdangtsü atema Congress-i ozüngtem tesashiba yangluogo, ta ashi.
Kathua nung atalokba dak sendakba nung Jammu & Kashmir Chief Minister, Mehbooba Mufti-i jembiba o aija Manmohan-i, “Lai iba ken o ya süoki agitettsüsa liasü. Tetenzük nungi lai iba ken o süoki ia agia inyak nung ajungtsü liasü,” ta ashi.
Kathua aser Unnao na nung teburtemi tetsür dak tashiyim amshia raksatsüba anema nüburtemi ola adokba sülen ang Ato kilonser, Narendra Modi-i, aibelener shinga danga tai matoktsü aser takoksa angurtem nem ochi temeden agutsütsü, ta nangzük.
Delhi nung B R Ambedkar asoba anogomong amongba sentong ka nung jembidang Modi-i, “Asen jalatemi ochi temeden angutsü,” ta ashi.