Agriculture University atema Centre-i fund agütsüogo

Shillong, Rongchii 18 (Agencies): Meghalaya Chief Minister Conrad K Sangma-i Sangtennü Assembly nung Central sorkari Meghalaya nung Central Agriculture University (CAU) ka amenoktsüba atema sen crore 30 shi agütsüba metetdaktsü.
Agriculture Ministry kübok Department of Agricultural Research and Education (DARE) puri 2010 küm Shillong-Guwahati Highway anasa Kyrdemkulai nung iba institution amenoktsüba atema ali acer 200 mekazükogo aser iba den külemi Umiam nung ICAR complex anasa post graduate college atema ali acer 40 dena mekazükogo.
Chief Minister-i ashiba agi, maparen shilem 30 bo tembanga inyakogo aser ali alizükba maparen tembangogo.
Paisa ashiba agi, Umiam nung temporary campus ka nung class tem agi tenzükogo aser state sorkari iba ken o süokia asadangtsü, ta nangzük.
Assembly nung ken o balala benoka ashishitepba mapang S K Sunn-i asüngdangba Agriculture Minister Banteidor Lyngdoh-i telangzüba junga magütsüba ajanga Conrad-i iba telangzüba agüja liasü.
Sunn-i project balala inyakyim indang osang ashishiba den minister dang 2010 küm sorkari university nem power, tzü, lenmang aser social security agütsütsü nangzüka aliba jangja ali mali ta asüngdanga liasü.