Tetsürtem anema inyakba nokdangtsüla: Ram Nath Kovind

New Delhi, Rongchii 18 (Agencies): Tanü linük Tir, Ram Nath Kovind-i Kathua nung tebur telok kati tetsür ka dak tashiyim amshir tepsetba aija jembiogo.
Tawa India nung tatalokbatem dak sendakba nung tiri, asenoki koba ama linük ka yangerteter?, ta asüngdang.
Kashmir nung arishi küm 8 tetsür ka dak tashiyim amshia raksatsür tepsetba dak sendakba nung Tiri, nüchiso ngur küm 70 dak tema tain linük ka nung item ama atalokba ya taaktsüka lir, ta ashi.
Katra, Jammu & Kashmir nung Shri Mata Vaishno Devi University 6buba convocation sentong nung jembidang Ram Nath-i, tetsürtem anema inyakba nokdangtsü atema asenoki inyaktsüla, ta ashi.
Pai, “Nüchiso anguba sülen küm 70 junger süaka linük tesem balala nung item ama atalokba ya taaktsü mapa lir. Asenoki koba ama linük ka yangerter? ta asenoki shisadangtsü nüngdak. Tetsür chanu mesüra tetsür shinga daka item ama mataloktsü atema inyaktsüji asenok teinyaktsü khuret lir,” ta ashi.
Tiri mejembidang Jammu & Kashmir chief minister, Mehbooba Mufti-ia taküm Aenjeti ita nung arishi küm 8 tetsür chanu ka anema inyakba atema jembia liasü.
Mufti-i, “Kodaser nisungi tetsür chanu ka dak taochi mapa yamaji inyakteter; asen lokti dak langka tai lir,” ta jembia liasü.