Sorkar mapatem nung PwDs nem mapa mekazüka yutsütsü akhanger

Kohima, Rongchii (April) 18 (TYO): Nagaland state sorkari persons with disabilities (PwD) nem mapa mekazüka meyutsü atema Gauhati High Court, Kohima Bench nung ken o ka benokogo.
Iba ken o ji Justice S. Serto, Judge Gauhati High Court tsüngdang benok aser state sorkar dang hopta pezü tsüngda iba ken o angadangtsü ta osang sangoktsüogo.
Gauhati High Court, Kohima Bench nung Writ Petition benokba nung, “persons with disability atema Act of 1995 yanglu saka Nagaland state nungbo iba Act mapa küma meinyaker,” ta shia lir.
Act of 1995 ajanga state government/public undertaking institutions nung tenük telen mabensartem nem mapa 3% mekazüka ayutsü lateta lir aser ano Act of 2016 ajanga minimum reservation 4% yutsütsü shia lir. Act of 1995 mapa küma tenzükba sülen Luroi (August) 19, 2004 nü state sorkari mapa 5% mekazüka yutsütsü ta sangdong ka agütsü saka ibaji meyipa agir Aenjeti (January) 16, 2008 nü 3% dang lemzüktsür ta metetdakja liasü.
Government of India, Ministry of Personnel, Public Grievances & Pensions, DOPT, North Block, New Delhi aser Government of India, Ministry of Personnel, Public Grievances & Pensions, DOPT-i Group A, Group B Group C aser Group D category mapatem nung 3% lemzüktsütsü tetuyuba agütsü saka state sorkari persons with disability shimoktsü atema mapatem mekazüka mayu, ta ken o benokertemisa ashi.
Iba onük atema state sorkar nem aiben shiditem zülu saka mapa kecha meinyakba agi High Court nung iba ken o benoktsü atema Nagaland State Legal Services Authority (NSLSA) teyari meshi ta parnokisa shisem.
Supreme Court-i teinyaktsü latetba nung Union Public Services-i IAS, IFS, IRS mapatem nung persons with disability nem mapa lemzüktsütsü shia lir, ajisüaka 2008 sangdong nung Nagaland nung EAC, AEO, SA (partial) amala mapa atema PwDs nem mapa mekazüka yuja mali. Supreme Court aser Government of India-i teinyaktsü latetba ama Nagaland sorkari meinyaker anungji High Court-i iba ken o atema obendang tajung ka agütsüdaktsünür, ta ken o benokertemisa metetdaktsü.