Meghalaya nung yimozülur ka kidang petrol bomb pokloktsü

Shillong, Rongchii (April) 18 (Agencies): Meghalaya kübok Umlping tesem nung mejangjatetba nisung anati The Shillong Times osangkaket yimozülur Patricia Mukhim’er kidang petrol bomb ka pokloktsü ta police-i Rasemnü (Bodbar) metetdaktsü.
Iba lendong ya Sangtennü (Mongulbar) atalok saka Mukhim yiruyibong kecha mesüi jenbuogo, ta East Khasi Hills SP Davis Marak-i ashi.
Patricia Mukhim-i loktiliba aser tetsür tashi aittsü atema mapa inyakba ajiteta 2000 küm la nem Padma Shri agütsü.
Yasüng 8:30 ako meta nisung ana motorcycle ka nung mener arur lar kidang bomb ji mereploktsü, ta SP Davis-isa ashi.
Iba dak sendakba nung FIR ka benokogo aser bushisüngdang tenzükogo. Mukhim-i temeten angutsü atema onoki mapa inyaktsü, ta paisa shisem.
Chief Minister Conrad K Sangma-ia iba tatalokba aitsüogo. “Iba ama lapi mapa inyakba atema sasa bilemer. Ni Home Minister den jembiogo aser onoki iba dak sendakba nung DGP den külemi mapa inyakdar” ta Conrad-i ashi.
Home Minister James Sangma-ia “Police-i iba tatalokba jungjunga bushisüngdang südar. Aibelenertem apuba sülen ang kechiba la dak tenük yoka mapa inyakar osang tejangja metettsü” ta Home Minister James-i ashi.
“Ozüng alema inyakertemi melamela jenbur. Press temeten anema inyakba ken o shia police-i süoki ia agitsüla” ta Patricia-i la indang Facebook page nung metetdaktsü.
“Miji electric short-circuit ka ajanga adok asütsü ta bilemer ni miji enseptsü merang. Ajisüaka, petrol menemba aser atem nung aina tejaksatem aliba ajanga nisung kari iba ya inyak ta ni ratet” ta laisa shisem.
Rasemnü (Bodbar) Opposition Congress-ia iba tatalokba aitsüogo aser sorkari ozüng alema inyakertem azüoktsü atema mapa inyaktsüla ta parnoki ashi.
“Linük nung osangzülurtem amaker. Parnok talenba kecha melii dang mapa inyaker ama bilemer. Linük Temzüng nung jembitsü temeten agüja aliba azüoktsü atema mapa inyaker ama ajiteter” ta Congress otongdar Zenith Sangma-ia ashi.
Shillong Press Club president O Laitphlang-ia ozüng amertem dang aibelenertem apoutsü atema mapa inyaktsü ayongzük.
“Ozüng alema inyakertem nem tekaratiba nung tapet temerenshi agütsütsüla. Asenok yimjung nung dang liyonga aru aser temenen mapa inyakertem metsübutsü. Onok mapa inyakba nung tetsükdaktsü agütsürtem nem onok mokokdaktsütsü aser onoki mapa inyakbaji tajangzük südaktsütsü” ta Laitphlang-isa ashi.
Patricia Mukhim-i yimobilem aser social media tem nung tetsür aser tanurtem kümzüka ayutsü indang onüktem kanga zülur. Rongchii (April) 13 nü lai yimobilem ka züluba nung Meghalaya nungi sorkari nakmati atutsü melaba sentong anema zülu.