Naga Mothers’ Association (NMA)-ia aitsür

Dimapur, Rongchii (April) 18 (TYO) : Naga Mothers’ Association (NMA)-i tanü sangdong ka nung ‘The Shillong Times’ yimozülur Patricia Mukhim’er ki amakba osang angashia kanga aoksar aser iba inyakyim khukhua aitsür ta metetdaktsü.
Yimjung atema inyaker aser osangzülurtem dak bomb pokloktsüba aser amokmerenba inyakyim anentsüla. Democratic loktiliba ka nung Tongshi Pezübuba (Media) talenbangba kecha melii sademsadema inyakdakjang ta onoki ayongzüker, ta NMA-i metetdaktsü.
Tetsütem ama onoki iba tatalokba atema temulung aronger aser Meghalaya sorkar dang tetsürtem kümzüka ayutsü atema mapa inyakang ta mepishir. Iba ken o atema tekaratiba nung temeten agütsütsü atema onoki ozüng amertem dang mapa timi inyaktsü aser nübortemia parnok den yariteptsü mepishir, ta NMA-isa ashi.
Naga Mothers’ Association-i Ms. Patricia Mukhim den tejashi lemsateper aser la nem iba tammang mapang koktettsü tashi agüjang ta sarasademtsür ta parnokisa shisem.