Assam nung LPG panchayats 296 ayongzüka akatsü

Guwahati, Rongchii 19 (Agencies): Indian Oil Corporation Ltd (IOCL) puri achaayanga Assam nung Rongchii (April) 20 Ujjwala Diwas nü LPG panchayats 296 ayongzüka akatsü. Iba anogo ya ministry of petroleum and natural gas indang Gram Swaraj Abhiyan nung shilem ka lir aser iba ajanga yimtsüng 3,042 nem connection tasen agütsütsü aser LPG amshiba tsütsü tangazükba balala agütsütsü.
Iba sentong ya Rongchii 14 nungi Monupii (May) 5 nü tashi akatsü.
Ato Kilonser Narendra Modi indang Sabka Sath, Sabka Gaon, Sabka Vikas campaign kübok kibong ajak nem LPG connection agütsütsüba sangdongogo.
IOCL’s Assam oil division, chief general manager Uttiya Bhattacharya-i ashiba agi, “Northeast tesem nung LPG panchayats 570 ayongzüka onok Ujjwala Diwas amunger. Onoki iba sentong nung tetsür 500-ibosa shilem agitsü imlar aser connections tasen 100 bosa agütsütsü. LPG connections ngur alirtemi iba ajanga tajangzüka agütsüba indang iba sentong nung lemsateptsü.”
“Onok nükjidongji Assam kübok district 27 nung yimtsüng 3,042 nung alir tetsür 2.4 nem Monupii (May) 5 nü tashi nungbo connection agütsütsü asoshi sentong lir. Iba scheme ya kanga sensak tia nung alirtem tongtettsüba atema atsülangshiogo. Iba dak sendakba nung sen kecha agütsütsü nüngdak madoker. Iba sentong kübok soft loan ama security sen 1,600 meshitsü koba mezüngbuba sylinder 6 atema subsidy bendena aliba nung aotsütsü. Stove ya sen 900 alang lir aser iba aliba senji state sorkari agütsütsü,” ta paisa ashi.
Iba maongka agütsütsüba atema tetsürtemji below poverty jenjang nung aliba kibongtem nungi asütsü, koba Socio Economic Caste Census list mesera BPL card kübok Scheduled Caste/Scheduled Tribe households, Pradhan Mantri Awas Yojana (Gramin), Antodaya Anna Yojana, arem nung alirtem, backward classes, tea tribes aser asetkong nung aliba nüburtem asadanger agütsütsü.