Dimapur Police-i ozüng nung aibelenertem apu

Dimapur, Rongchii 19 (TYO): Commissioner of Police, Dimapur nungi Addl. Dy. Commissioner of Police/PRO, Dimapur, Nagaland ajanga sangdong NO.CP/DMR/ESSTT-63/2017-18 nung shia liba agi, Dimapur yimti nung hopta tsüngta ozüng nung aibelener aika apu.
Rongchii (April) 16, 2018 nü Dimapur Police ajanga DC Court Junction temeket nung mita bushiba mapang Xerox dokan ka nungi Indian Made Foreign Liquor (IMFL) balala case 40 ngutet. Iba ken o nung ajemdaker arishi küm 23 tain, Guarav Kumar aser arishi küm 24 tain, Sunil Das apu. Iba sülen ken o züluoka bushisüngdang tenzükogo, ta Addl. Dy. Commissioner of Police/PRO, Dimapur ajanga metetdaktsü.
Rongchii 17, 2018 nü Nagarjan Junction nung tajemtsü tzü (mineral water) bottle tem yoka aliba dokan ka mita bushi. Iba mapang iba dokan nungi IMFL case 6 ngutet. Iba maparen nung United Colony, Nagarjan, Dimapur nung alir arishi küm 20 tain, Rahul Das apu aser ken o züluoka bushisüngdang tenzükogo, ta kasa sangdong ajanga ashi.
Amit, IPS-i anir Dimapur Police temi Rongchii (April) 18, 2018 nü Purana Bazar nung Hollohon Petrol pump anasa dokan ka ajungben mita bushiba mapang IMFL tabu balala case 20 ngutet. Iba maparen dak sendakba nung Sikar district, Rajasthan nungi tang Purana Bazar Dimapur nung alir arishi küm 37 tain, Rajendra Singh apu aser ken o bushisüngdang südagi.
Rongchii (April) 18, 2018 nü 41 Assam Rifle temi Old Aree yimtsüng, PS Sungro, Wokha nungi Rapemo’er jabaso arishi küm 42 tain, Robin Lotha (S Leacy NSCN (R)) apu. Pa ket nung .22 pistol ka den injang ana liasü. Iba ken o züluoka bushisüngdang tenzükogo, ta osang ajanga ashi.
Rongchii (April) 18, 2018 nü GRPS züngsemtemi nisung ana phensedyl bottle 270 bene lia apu. Tena ya Lambulane, Jail Road, Imphal West Manipur nung alir Yethum kinungtsü, Nengboi Haokip aser Gamnom Veng Binda Part-3, Moreah, Chandal Manipur nung alir Otkhomang Haokip’er jabaso, Seijahao Haokip, ta jangjaogo. Iba indang ken o züluoka bushisüngdang tenzükogo, ta kasa sangdong ajanga metetdaktsü.
Rongchii (April) 19, 2018 nung osang tejangja kar angashiba sülen Dimapur Police temi nisung ana apu. Tena ya Longki yimtsüng, Po/Ps Khatkhati Assam (Karbi-anglong) nung alir Nkhao Lotha’er jabaso aser NSCN (IM) züngsem Renben Lotha aser Aokong Colony (Dellai gate anasa), Po/Ps West Police station nung alir Sashirga Ao’er jabaso aser NSCN (U) nung züngsem, Lanuyanger Ao ta jangjaogo. Tena ya NSCN (IM) aser NSCN (U) tenüng nung truck driver tem dang ozüng alema tashiyim agi sen sarua lia apu, ta osang ajanga ashi. Tena ket nungi sen 9390 den tax coupon tem ngutet aser iba ken o züluoka bushisüngdang tenzükogo, ta kasa sandong ajangasa metetdaktsü.