‘Tongti Tesemdanger’ sobaliba nokdangba pelaa agizüker: NVCO

Kohima, Rongchii (April) 19 (TYO): People’s Democratic Alliance (PDA) sorkari minister tem, MLA tem aser sorkar ketdangsertemi sentong balala nung ‘Tongti Tesemdanger’ ama jaokba nokdangba den külemi senotsü tenla agutsüba mesüra nangzükba inyakyim nokdangtsü atema lemtetbaji Nagaland Voluntary Consumers’ Organisation (NVCO)-i pelaa agizüker aser nungiter, ta tanü Press & Media cell, NVCO-i sangdong ka nung metetdaktsü.
“Iba telemtetba ajanga Minister tem, MLA tem aser sorkar ketdangsertem yariba dang masü saka nüburtema tajangzük angutsü, kechiyong ibaji ajanga public funds nungi senotsü agizüka amshiba anentsü, koba ajanga public funds ji MGNREGA süaka, old age pensions, persons with disabilities, terenlok mapa balala aser human resources projects, BPL/AAY atema timi amshitettsü,” ta sangdong nung shia lir.
“‘Tongti Tesemdanger’ oren ya akhümtsübu agutsüba dang masü saka talisa senotsü imlaba tuluba lir ta asenoki angatettsüla. Public function mesüra Jubilee mong amongba mapang nung nüburtemi tongti tesemdangeri kechi jembir, ta masü saka pai/lai sen kwi tenla agutsür ta osangolar,” ta parnokisa metetdaktsü.
“Kaketshir Union tentet aikati ‘Tongti Tesemdanger’ jaoktsü atema, shibai sen timba tenla agutsütsü? ta tama asadanger. Kaketshir mongdang aser college sentong balala nung matriculate-a masüba nisung ka ‘Tongti Tesmedanger’ jaokba asenoki ajangshiogo. Nisung aikati Tongti Tesemdanger dang nungi senotsü tenla aika imlaa sen aika jenjang sempet alia agutsür, arem shiruru tenla agütsür aser mesü mesüra ozü shi renema agütsür. Tesüiba mapangtem nung tongti tesemdangertem nem tenla agutsüba sempettem rongnung; sü, sobaliba sobutsü teperi aser süng agi chitetba osettsüset densema lir,” ta sangdong nung shia lir.
“Joko tangbo iba sobaliba yimya tatembang kati aruba atema Tsüngrem dang pelar. Iba ya telemtetba tajung ka lir, koba ajanga nübur aser yimtenren lenirtem, ketdangsertem, takartem, conractor tem aser sorkar mapa inyaker ajak ajangzüktsü. Iba ya ajanga VIP sobaliba tatembang kati arudaktsüba dang masü saka asen state rongsenkettsüng jenjang majungba-a anentsü,” ta NVCO-isa metetdaktsü.
“Joko nübur, talisa lokti tentettem, public organizations, associations aser kaketshir tentettemi tongti tesemdanger jaokba sobaliba anentsüla, sen magitsüla mesüra senotsü tenla meimlatsüla, naro sempettsüba dak alaka jenjang tasak sempet mesüra asem shiruru aser ozü sangnu magutsütsüla,” ta NVCO-isa metetdaktsü.
Joko tongti tesemdanger maliba ajanga sentong balala tayongertemi sen kanga meyaka amshia sentong ayongzüktsü, ta parnokisa ashi.
Ano külen NVCO Tir, Kezhokhoto Savi-i, Cabinet-isa public fund nungi party fund/secretary commission/minister commission/MLA commission tenüng nung commission/percentage magitsü atema telemtetba agira ibaji ajanga nübur kanga ajangzüktsü, ta metetdaktsü.
Tamalen Nagaland Govt. Registered Class-1 Contractors’ Union (NGRC-1 CU)-ia state Chief Minister dang mapang shidak nung project balala tembanga inyakba den külemi project ajak junga inyaktettsü atema project fund nungi ‘commission’ mesüra percentage magitsü atema mepishiogo.