ECI-i Nagaland nung NDPP ya state party ta agizükogo: NDPP

Kohima, Rongchii (April) 19 (TYO): Election Commission of India (ECI)-i Nagaland Legislative Assembly elections nung Nationalist Democratic Progressive Party (NDPP) indang poll performance reprangshia NDPP-i Election Symbols (Reservation & Allotment) Order, 1968 kübok tekong Para 6A (i), (iii) aser (v) nung lateta aliba ama inyakba nung ajemdaker NDPP ya state nung State Party ka ama agizükogo, ta tanü Media & Communications Committee, NDPP-i sangdong ka ajanga metetdaktsü.
ECI-isa NDPP-i mepishiba ama party maitsü “Globe” agizükogo, ta metetdaktsü.
“NDPP ya Monupii (May) 17, 2017 nü tenteta liasü aser Mongputeni (October) 13, 2017 nü ECI-i register asüba yimtenren party ka ama agizük. Registration agiba sülen hopta ishika tsüngda NDPP-i Tsüklai (February) 27, 2018 nü Nagaland Legislative election nung shilem agia toktep. Nüburtem vote ajanga state sorkar, People’s Democratic Alliance (PDA) teloktep nung NDPP-i maongka angu. Yamaji tangbo Rongchii (April) 17, 2018 nüngi NDPP ya Nagaland nung registered aser recognized yimtenren party ka kümogo,” ta sangdong nung shia lir.
Temzüng nung lateta aliba nung ajemdaker ECI-i nüngdakba mera agia tekaraba nung maparen ajak inyakba atema NDPP-i ECI dang pelar, ta NDPP-i metetdaktsü.
“Ita ishika tejaklen ang tenzükba party tasen ka süaka NDPP-i tongti alizüng aika tongtetogo aser party nung lenir tajung aika aliba den külemi nüburtem teyaritep ajanga tongtibang mapa aika inyakteta odar. Onoki state sensotem dang kanga pelaba lemsateper aser party nung lenirtem dak tamang katetba den külemi party tangatetbatem pusemba atema nüburtem dang pelar,” ta sangdong nungsa shia lir.
“Tangari yazü osang prokba nüburtemi mamangtsü ta NDPP-i imlar, kechiyong party-i nüburtem tangatetba tajung akhümtsübur. Ochi nung ajemdaker nübur ajak jenjang ajungkettsütsü atema NDPP-i anibelema maneni meranga inyaktsü aser party tajemdakdak omen “O masü Mapa” nung ajemdaker inyaktsü,” ta NDPP-isa kasa sangdong ajanga metetdaktsüogo.