Wb. Lanu Longchar asüba atema mangyimer: K Therie

Kohima, Rongchii (April) 20 (TYO): Wb. Lanu Longchar asüba osang angashia mangyimer, ta tanü NPCC Tir, K Therie-i sangdong ka ajanga metetdaktsü.
“Asür Lanu Longchar-i 1980 küm Congress party nung aden aser Congress nübo ka ama melungtoka liasü, iba den külemi tensa balala ajuruaka pa tasünü tashi party atema melung lemtetba lenir ka liasü. Pai NPCC Ex-Servicemen Cell nung Chairman inyakba den cell aika nung menden balala nung inyakogo. Pai DCC otongdar ka aser DCC, Dimapur Advisor ama tenzüka aruogo,” ta sangdong nungsa shia lir.
“Asür Lanu Longchar ya lokti tenzüker tajung ka liasü, aser pai nübur timtem atema kanga nendaka inyakogo, iba den külemi lendong mesüra nüngdakba mapang balala nung nübur timtem pungbatsü atema pai kanga meranga inyakogo,” ta sangdong nung shia lir.
“Pa asüba ya Congress party atema dang masü saka Naga lokti atema takoksa asütsü. Pai tatishitsü tajung sayuba den külemi party aser lokti junga tenzükba mapaji kodanga mamatoktettsü,” ta NPCC Tirisa metetdaktsü.
NPCC lenirtem ajaki asür kibong züngsemtem den mangyim lemsateper; iba ama mangyim mapang nung Tsüngremi taochi agi asür kibong züngsemtem nem tesünep agüjang, aser asür tanela tesünep nung anisüngzükdakjang ta sarasademtsür, ta kasa sangdong ajanga metetdaktsü.