MLA Tovihoto Ayemi-i ‘Saubaghya’ scheme tenzüktsüogo

Rongchii 20, 2018 nü Conference Hall, Electricity House, A.G Colony Kohima nung MLA aser Power Advisor, Chairman DPDB Dimapur, H. Tovihoto Ayemi-i official süa SAUBHAGYA ‘Pradhanmantri Sahaj Bijli Har Ghar Yojana’ tenzüktsüba noksa nung angur. 

Kohima, Rongchii 20 (TYO): Tanü Conference Hall, Electricity House, A.G Colony Kohima nung MLA aser Power Advisor, Chairman DPDB Dimapur, H. Tovihoto Ayemi-i official süa SAUBHAGYA ‘Pradhanmantri Sahaj Bijli Har Ghar Yojana’ tenzüktsüogo.
Iba sentong nung ketdangsertem aser staff tem den jembidang Tovihoto-i power sector dak sendakba nung sensakertem atema schemes kanga melungsüa inyakdar aser state nung jenjang tajungba kümdar, ta metetdaktsü.
Paisa, kobi melii state kübok light mesangoka maliba kibongtem ajak nung light mesangoktsü imlar, ta ashi.
Paisa nüburtem dang Power Department-i yimtsüngtem nung camps ayongzüka akatsü, aser iba scheme agitettsü atema osangkakettem ajanga jelia osang metetdaktsütsü, ta shisem.
Okila jembidang Commissioner & Secretary, Power & IT&C, K.D Vizo-i, iba scheme nükjidongji kibong ajak nung light mesangoktsü atema lir, jila aser yimtsüngtem nung light mesangoktsü melunger ajak nem light connection sütsütsü, sensakertem nem angati light connection agitsütsü aser kanga tezülen aliba kibongtem nem solar power packs agütsütsü atema lir, aser iba maparen ya sangküm Metsüremi (March) 31 tashi nungbo tembanga inyaktsü imlar, ta metetdaktsü.
Iba scheme ya kaketkuli tejangja aser maitsü tejangja agütsüba ajanga angutsü.
Tanep iba sentong nung Asst. Pastor, CRC Tsiepfutsiepfhe, Khriesavituo Belho-i sarasadema liasü aser Chief Engineer (D&R), Er. Khose Sale-i tepela anküp o jembi.