Mokokchung nung ‘Ujjawala Divas’ anogo among

Mokokchung, Rongchii (April) 20 (TYO): India lima ajunga nung ‘Ujjawala Divas’ amungba den külemi Mokokchung nunga Longkumer Gas Agency puri ayongzüka Longkumer Kilem, Mokokchung nung sentong tajung ka ayongzüka kaogo.
Iba sentong amungba den külemi Pradhan Mantri Ujjwala Yojana (PMUY) sentong kübok yimdak yimtsüng nung alir tetsür parnok 33 nem teyari LPG new connection agütsüogo. Iba teyari agütsüba sentong nung Watsü Mungdang tir, Wt. Maonginla tetushi tesemdanger ka ama arua shilem agia liasü.
PMUY ya India Prime Minister Narendra Modi-i May 1, 2016 nü tenzükja liasü aser iba sentong tenzükba ya tongtibangsa yimdak yimtsüng nung tepetzük jenjang nung alir tetsürtem nem mapang meindoki rongsen kümzükba den tashi kümzüka aser merüka sorochioktsü aser parnok taküm jenjang melenshia ajungketsütsü nükjidong yur tenzükba ka lir.
Iba teyari ya yimdak yimtsüng nung tetsür tepetzük jenjang nung alirtem asoshi lir, anungji, nüngdakbapurtemi gas agency pur den tongtepratepa iba teyariji agitsü akok, ta Longkumer Gas Agency kibur, M.B Longkumer-i iba osangbener den jembidang metetdaktsü.