NPF-i jangjashitsür; RD dang reprangshimtsü mepishir

Dimapur, Rongchii (April) 20 (TYO): Naga People’s Front (NPF)-i Rural Department nung meshitak inyakba kar tuteta ashiba ajanga kin aser kidong teloktem dener ashishitep ken o ka adokba atema sasa bilemer, ta Press Bureau sangdong ka nung metetdaktsü.
Taoba hopta iba tebilemtsü lemsatepba sülen NPF-ibo sorkari kuli kar agütsütsü südi ta imlaa liasü aser telok aikati sangdong balala agüjaka NPF-i ola madoki dang ataa liasü. Ajisüaka tang iba onük atema Opposition lennir, TR Zeliang tenüng amtsüsa tensa ka ajuruogo aser iba ya Democracy atema tetsükdaktsü ka lir, ta NPF -i ashi.
Sorkar ketdangsübaren nung tim mesüi inyakba atema opposition mesüra sensotemi ola adokba nembangtsüba ajanga asenok tim lenmang nung maoer ta asüba kuli sayur. NPF party-i nisung ka dak tenük yoka mapa inyaker meyiper tai tongloktsür. Yimtsüng ka nem sen talila lemzüktsü ta asüba onükjibo agizüker saka ano meyiper Opposition lennir dak ang tai apur, Press Bureau sangdong nungsa shia lir.
NPF-i sorkar ketdangser shinga dena mangatettep mali aser iba onük nung tetshiba ketdangserji Administrative Head of Department lir. AHoD ji tanga nisung ka asü nunga tenüng tetshila. Talisa sen talila lemzüktsüba yimtsüng nung alir ka asünungbo pa/la tenüngji tetshitsüsa, ta parnokisa shisem.
NPF-i iba onük nung ajangzüktsü kecha mali saka state ajunga ajungtsü tangatetba nung dang ola adok. Yimtsüng kar dang masü saka yimtsüng ajak ajangzüktsüla ta NPF-i bilemer, anungji iba onük ya mashileni angateta maotsü mepishir. Talisa Naga nunger ajak ajangzüktsü atema department-i senotsü lemzüktsüba nung tim mesüi inyakba reprangshimtsü ayongzüker, ta Press Bureau sangdong nungsa shia lir.