Tanidaker kin ka masü saka tanishir asütsü merangdi: S.C Jamir

29 buba Ao Senden yimkong mungdang yangi Mokokchung town hall nung takok ngua agir külen, Ao Senden ketdangpuri anir külem tenzükertem noksa nung angur. (Mokokchung, Rongchii 20, 2018)

Mokokchung, Rongchii (April) 20 (TYO): Rogonü (Hogulbarnü) 29 buba Ao Senden yimkong mungdang yangi Mokokchung town hall nung takok ngua mungogo. Iba senden nung Ao Senden kübok aliba town unit aser yimtsüngtem nungi nisungtem longsoa arua shilem agia aden.
Tanü iba sentong nung tayongzükba o jembir Wb. Dr. S.C Jamir-i jembidang, taoba mapang Ao kin-i kechi bilemer ta jembia aru, aji saka, tanübo yamaji masü, anungji, tanidaker kin ka masü saka tanishir ka asütsü asoshi ashiakang o ka metetdaktsü.
3rd August, 2015 nung koba ‘frame work agreement’ yanglua lir, iba ya nüburtemi memetetba agreement ka lir, anungji, iba nungji kechi zülua lir, ibaji nübur nem metetdaktsütsüla, ta paisa tebilemba ka ashi.
“Naga nunger taginübaji Naga nungeri dang metet aser tamakoktsü indang masü saka takoktsü kechi lir, ibaji jembia renemtsüla”, ta paisa shisem.
Naga nunger ya tajemrepba kin ka masü, aji saka, asenoki junga melitetba ajanga tanü Nagaland laoa lir, anungji, Naga lima mesotsü asoshi Ao kini anir asentenshia tenzüktsüla aser iba asoshi kaket shisaliok (education) nung temulung agütsütsüla, ta paisa ayongzüka liasü.
Kümsük 2018 nungi 2020 Ao Senden ketdangsüa bener aotsü asoshi item ketdangpurtem shimogo; tir – Wb. Moatoshi Jamir (Süngratsü), tatong tir – Wb. Chubawati Longchar (Nokpu), tongti zülur – Wb. Imtipokyim (Khar), repsem zülur – Wb. Arentemjen Jamir (Akhoya), senotsü zülur- Wb. Imlitemjen (Longpayimsen) aser Kimen – Wb. Longritemjen (Ungma).