NEPEx atema Dimapur DDMA senden amen

Dimapur, Rongchii 24 (TYO): Rongchii (April) 26, 2018 nü Nagaland Emergency Preparedness Exercise agitsü aliba mapalem atema DC Conference Hall, Dimapur nung District Disaster Management Authority (DDMA) Dimapur ajungben senden ka Rongchii (April) 23, 2018 nü menogo.
Iba senden ya ADC Dimapur, Sara Jamir-i ketdangsüa agi aser NEPEz exercise agitsü asoshi tesem, relief camp, Ambulance service, traffic, medical team, law & order, EOC, communication, transportation aser iba dak sentakba onüktem jembi.
Shidakba lendong ajuruba mapang renemshia alitsü mechi iba anogo traffic azüoktsü asoshi terenemshiba balaka malitsü ta iba senden nung lemtet. Iba mesük ambulance tem yoktsü asoshi akasa mapang nungang lemtettsü. Relief camp aser iba sentong agitsü atema tesem kasa nung dang asüsü.
Iba mock drill ya St. Mary’s Montessori school, Hill Star Cinema Hall, City centre shopping mall aser Notun Basti nung alitsü lemtet aser iba sentong takok ngua agitettsü atema DEO, Police, DMC aser administrative ketdangsertemi Home Guard tem den osang ola agiteptsü.
Iba senden nung DRPO Dimapur, Lolano Patton-i taoba küm Dimapur nung NEPEx exercise agiba indang documentary minute 24 sayua liasü.