DC Kohima-i Gram Swaraj Abhiyan sentong sayatsü

DC Kohima, Rajesh Soundarajan, IAS-i Rongchii (April) 24, 2018 nü DC Office Kohima nung Gram Swaraj Abhiyan Campaign flag off sütsüba mapang tangokba noksa nung angur.

Dimapur, Rongchii 24 (TYO): Gram Swaraj Abhiyan Special Campaign sentong DC Kohima, Rajesh Soundararajan, IAS-i Rongchii (April) 24, 2018 nü DC Office, Kohima nung sayatsü.
Kohima district kübok teshiemtet yimtsüng 58 dangi LED Bulb bener aotsü asoshi gari 15 flag off sütsüba mapang, iba sentong ya nüburtem ajak nem jenjang tajemba nung LED agütsüba (UJALA Yojna) ajanga Unnat Jyoti ajungkettsü aser kidang, office, Commercial Institutions nung power tajemba atsükba osettem amshitsü aser ‘star labeled products’ tem amshia ita shia electricity bill ajemdaktsütsü nükjidong nung tenzük, ta Deputy Commissioner-i ashi.
Iba sentong nung aliba ama LED Bulb tem amshirdang transformer nung load ajemdaktsütsüsa amshitsüla, ta paisa ashi.
Iba LED Bulb ajanga Carbon ajemdakja tzümopung yaritsü. Nüburtemi iba bulb ya subsidized jenjang nung bulb shia sen 50 agi alitettesü aser kibong shia bulb asem tashi Aadhar aser Ration Card amala sayur meshitettsü, ta Kohima DC-isa ashi.
Iba bulb bena aliba garitem ya Rongchii (April) 24 nungi Monupii (May) 5, 2018 tashi nung yimtsüng ajunga tongjemtsü.
Iba campaign ya EESL den külemi Kohima District Administration ajanga ayongzük, ta osang ajanga ashi.