ANCSU-i KSC ali atsünga agiba atema ola adoker

Kohima, Rongchii (April) 24 (TYO): Sorkar department tem, kija aser arogotemi Kohima Science College Jotsoma indang ali atsünga agiba odang meyutsütsü ta All Nagaland College Students’ Union (ANCSU)-i metetdaktsü.
Metsüremi (March) 14, 2018 nü District Administration dang anogo 40 tsüngda telangzüba ka agüjang ta mapang latettsüba tanü tembanger saka telangzüba kecha mangu lir. Ajisüaka, KSC, Jotsoma nung yanglua aliba kiojentem tangsa agientsü akhanger, ta ANCSU tir Katho P Awomi-i ashi.
ANCSU-i Rongchii (April) 19 nü Chief Minister Neiphiu Rio nem tezüluba ka agütsüogo aser Science College lapoktsü atema ali anguba nungi inch ka danga magütsütsü, ta Awomi-isa ashi.
Ali acre 200 indang official records kecha mali saka Yimpoksüi (November) 19, 2015 nü Land Revenue Department-i osang agütsüba nung sorkari ali acre 150 atema sen agütsü aser acre 50 ji Jotsoma yimtsüngi tenla agütsü ta shia lir, saka tang College ket nung ali acre 133.75 dang anünga lir, ta paisa shisem.
Tanüngba aliji ozüng alema yangluba allotment order mesüra allotment order melii sorkar department asem- Public Health Engineering, Doordarshan Kendra aser Regional Centre for Excellence in Music and Performing Arts (RCEMPA) den kijatem aser arogotemi atsünga agia lir.
District Administration-i yakta ANCSU lennirtem, college ketdangsertem aser Higher Education Department nunger den College meyong ali acre 200 indang survey ka asütsü ta nangzükogo. Sorkari class metenzükdang mapa meinyakra, kaketshirtemi tejashi sayua Science College ali nung yanglua aliba sorkar department asem indang kiojen raksatsütsü, ta ANCSU-i metetdaktsü.
Ano külen, Department of School Education-i VIPs, Directorate office, District Education Offices aser Sub-Divisional Education Office tem nung tesayurtem mapa lemzükja aliba manienba atema ANCSU-i mepelaba olen ka metetdaktsü.
Shisaliok rejutem nung tesayur agi meperir anungji VIPs aser tanga office tem nung tesayurtem mapa lemzükja aliba agientsüla ta sorkari Mongputeni (October) 31, 2017 tetuyuba ka agütsüba ama mapa küma inyaktsüla, ta ANCSU-isa shisem.
Iba takhangba ama meinyakra VIP aser office balala nung attached süa aliba tesayurtem mapa nungi anentsütsü aser parnok melena tesayur tasentem shimotsü atema takhangba agütsütsüsa akümtsü, ta parnokisa ashi.
Yaküm Yimpoksüi (November) ita taoba NPF sorkari scholarship scheme tem inyaktsü atema cell mesüra nodal department balaka tentettsü mulunga agizük anungji People’s Democratic Alliance sorkari iba mapa ya tekaratiba nung mapa küma tenzüktsü mepishir, ta ANCSU-isa ashi.