Mkg DAPCU-i ayonga ‘HIV & AIDS’ onük angatetdaktsüba sentong aka

Mokokchung, Rongchii 25 (TYO): Mokokchung nung aliba 44 Assam Rifles-i teyari agüja District AIDS Prevention and Control Unit (DAPCU) Mokokchung-i ayongzüka yangi Assam Rifles pur indang Prasidhan Hall nung Rasemnü (Bodbarnü) “HIV & AIDS” onük dak sendakba nung angatetdaktsüba sentong ka kaogo.
Tanü iba sentong nung shisalen sayur Mokokchung Imkongliba Memorial District Hospital, ART Centre, Medical Officer, Dr. Temsümenla Longkumer-i “HIV aser AIDS” na tebendang indang ashidang, HIV ya mesen (virus) ka dang lir aser AIDS ya HIV mesen ajanga meilongi nisung ka temang nung tashidak aika kümdakja shirangdaktsüba tashidak ka lir, ta metetdaktsü.
Laisa HIV & AIDS ya kechi ajanga menar? kechi asünung nung memenar? iba tashidak aketba ya koma sür asenoki metettsü? iba tashidak agi menepba ajanga nisung ka taküm koma tashi maiti kümdaktsür? aser koma asünung iba nungi jenbua litettsü? ta asüba tekümdangtsü o kar lemsatep.
Laisa HIV aket-maket tendangnürtem atema angati tendangdangdak centre balala tuyua liasü aser iba tashidak ya taneptsü manguba tashidak ka süaka, ibai yakta puteta Anti-Retroviral Therapy (ART) mozü achiba ajanga nisung ka arishi küm atsülangteter, anungji, mapang shia tendangtsüla aser jangratemtsükaji iba tashidak aketertem nem sorkari angati mozü agütsür, ta laisa lenmang kar sayua liasü.
Kasa sentong nung mozülartem atema “Opioid Substitution Therapy (OST)” onük nung ajemdaker OST Counsellor, Chungpongchilai jembidang, OST mozü agiba ajanga tashidak tapu aika nungi nokdanger aser iba ya achiba ajanga tajangzük jenti lir, kechiyong OST mozü achiba nung tanga timtem (side effect) magütsür aser lendong ataloktsü (overdose asütsü) chance kangabo mali aser tajung kaji iba mozü ya sorkari angati centre balalal nung agütsür, ta ashi.
Sentong nung DAPCU DPO, Makshi Jamir-i Mokokchung district nung ‘HIV & AIDS’ jenjang/tia indang power point ajanga telok dang sayua liasü. 44 AR Commandant, Col. K.S Kataria-ia mapang tatsüka agidang, iba tashidak indang ya züoki ia bilemtsüla aser Nagaland nung iba ya meshimeshia samatsütsü asoshi ajak lungjemer inyaktsü tayongzükba ka agütsü.
Iba sentong nung 44 Assam Rifles nungi jawans-tem den ano Mokokchung town nung aliba school balala nungi kaketshirtem aika arua aden. Sentong nung DAPCU DIS, Mofutula menden liasü aser 44 AR SMO Maj C.N Shyam-i tepela o metetdaktsü.