Tanü Nagaland Emergency Preparedness Exercise (NEPEx) agitsü

Kohima, Rongchii (April) 25 (TYO): Home Department kübok Nagaland State Disaster Management Authority (NSDMA)-i Rongchii (April) 26, 2018 nü Nagaland state ajunga nung ‘mega mock exercise’ ka agitsü.
Iba sentong ya Nagaland Emergency Preparedness Exercise (NEPEx) kübok agitsü aser district ajak nung asüngnep 10:00 ako nungi agitsü.
Lendong tulu atalokdang sorkar koba tashi renema lir ta tendangtsü aser ano nübortem dang lendong atalokdang renema alitsü teinyaktsütem metetdaktsütsü atema iba sentong agitsü.
Tanü ATI nung Home Secretary (incharge of NSDMA) Rovilatuo Mor menden ser department balala den senden ka amen.
Senden nung relief camp, base camp, make shift hospitals, control room tem lapoktsüba den lendong atalokdang yariteptsü, garitem senzüdaktsütsü, traffic acha-ayangtsü, mi enseptsü, rescue team aser rapid response team tentettsü, ambulance amshitsü, mozü aser tang nüngdakbatem agütsütsü aser wireless o tanga communication systems tendangtsü indang onüktem benoka lemsatep.
Iba mock drill ya Emergency Response Plan tendangtsü aser sendaka alirtemi tebilemtsütem lemsateptsü atema agitsü, ta NDMA joint advisor (Ops) Dhirendra Singh Sindhu-ia senden nung shi.
Nagaland DGP Rupin Sharma (IPS)-i drill agiba mapang Kohima, Dimapur aser Mokokchung nung lenmang kar noktangtsü tebilemba ka shidang. Iba mock drill ajanga state koba tashi renema lir metettsü, ta paisa ashi.
NEPEx ya shitakba lendong ataloktsü indang masü saka renemshiba mapa ka dang lir, anungji nübortemi maoksatsü saka ketdangsertem den yaritepa iba mock exercise timi agitsü mepishir, ta NSDMA-i metetdaktsü.
Public-i menoknok/lendong-tsüdong ataloktsü ta olulu osang meprokshitsü atema mepishir, ta parnokisa shisem.
OSD to NSDMA Johnny Ruangmei-i ashiba agi, “Yangtepnü (Brihostibar) anepdang 10:00 ako nung Kohima nung tesem balala nung tenla ki tsüngtsüngtem atemtsü aser ibaji mock drill tetenzüker asütsü.”
Iba atema Kohima nung aliba Cathedral, Chakhesang Baptist Church Kitsubozou, Christian Revival Church Kohima Village, Christ King Parish, Peraciezie Baptist Church, Ao Baptist Arogo Paramedical, St. Francis De Sales Parish (CPC) aser NBCC arogotemi asüngnep 10:00 nung minute asem atema tsüngtsüng atemtsü aser ano minute ana lir külen tanaben atemtsü mepishir, ta paisa metetdaktsü.
Mezüng tsüngtsüng olaji nisung ajaki “Drop, Hold and Cover” atema asütsü aser minute ana lir külen tanabuba tsüngtsüng atemtsü aser idangji SEOC aser stagging area-i arutsüla, ta paisa shisem.