Champions League: Liverpool-i 5-2 agi Roma akok

Liverpool, Rongchii 25 (Agencies): Egypt nunger Mohamed Salah-i goal ana agütsüteta Anfield nung Sangtennü (Tuesday) Champions League semi-final mezüng leg asayaba nung Liverpool-i AS Roma madak 5-2 agi akok.
Menur süaka Roma nungi asayartemi goal ana agütsütetba ajanga taoba round nung Barcelona telok tsükdaktsür Italy telok ya taruba Rasemnü (Wednesday) par tesem (home) nung asayaba mapang küpzüktsü asoshi teimla lir.
Salah-i pa taoba mapang asaya aliba club nem goal ana agütsüteba ajanga mezüng asaya shilem tembangba mapang Juergen Klopp’er telok ya goal 2-0 agi timba liasü, aser iba sülena Liverpool-i Roma madak kanga junga asayatet.
Sadio Mane-i goal ka aser Roberto Firmino-i goal ana agütsüteta Liverpool ya 5-0 aküm aser iba sülen Klopp-i temulung lema Salah asaya nungi anisüngzükdaktsü.
Saka Edin Dzeko-i AS Roma atema minute 81buba nung goal ka agütsütet aser minute pezü lir Diego Perotti-ia penalty nung goal ka idakja Rome nung asayatsü asoshi tebilemtsü ka kadaktsü.
Asaya tatemlen goal ana yoktetba ajanga Liverpool fan tem Anfield toktsür aoba mapang terabo temulung müsüi senshi.
Taoba round nung Manchester City den asayaba mapang ama Liverpool nungi par asemi sempet tajung sayuogo.
Stadio Olimpico nunga Roma pur defence ya kasa jenjang nung asayara Liverpool ya kecha tetsükdak melie Kiev nung Monupii/May 26, 2018 nü Bayern Munich mesüra Real Madrid den final asayatettsü. Telok ana ya semi-final mezüng leg Rasemnü/Wednesday asayatsü.
Iba asaya tenzükdang Roma teloki kanga junga asayaba ajanga Liverpool fan timba sür adenshia aliba Anfield tesem balaka aküm.
Asaya tenzüker minute 18buba nung midfield nung asayar Alex Oxlade-Chamberlain stretcher nung ajunger tuguba ngua home crowd yimya tamajungba aküm.
Mane-i asaya tenzüker minute 29buba nung goal ka agütsütsü maongka angu, saka Senegal nungbai metsüba ball ya Roma goalkeeper Allisson Becker-i kanga junga nokdangtet.
Iba sülen minute 35buba nung Salah-i mezüng goal ya agütsütet.
Defender Dejan Lovren-ia goal ka agütsütettsü maongka ngutet, saka pa kolak agi tongloktsüba ball ya goal post bar nung tsükdak.
Iba sülen Salah-i iba season nung goal 43buba agütsüteta telok ana tsüngta 2-0 aküm.
Football asayar telok aikati mezüng asaya shilem tembangba mapang 2-0 agüja aliba yabo kübzüktettsü südi ta bilema alitsü akok. Sala Roma defence nung tashi mait aliba ngua Klopp’er teloki tajungba asaya.
Minute 56buba nung Mane-i goal ka agütsüteta par telok ya 3-0 kümadok aser mapang talangka melie Firmino nem Salah-i pass asüba ball ya amajok nung meindoki agütsütet.
Minute 68buba nung Firmino-isa goal mka agütsüteta 5-0 aküm.
Saka asaya tembangtsü minute toku dang lia Bosnia nunger Dzeko-i Roma asoshi goal ka agütsütet, aser iba sülen James Milner-ia handball ka menaa penalty agütsü. Roma nungi substitute nung aiter, Perotti-i iba penalty nung par telok asoshi tanabuba goal ya agütsütet.