Barcelona Open: Djokovic tsükogo, Nishikori yirur tugu

Barcelona, Rongchii 25 (Agencies): Djokovic yiruba ajanga asayamung aika nung shilem magi arur tang Rasemnü Barcelona Open mezüngbuba asaya nung Martin Klizan mokoki tsükogo.
Djokovic iba asayamung quarter final nung Rafael Nadal den asayatsüba liasü, saka pai junga masayatetba ajanga world ranking 140 buba nung alisang Klizan-i pa 6-2, 1-6, 6-3 agi kokogo.
Klizan last 16 nung Spain nunger clay court nung asayar mongin Feliciano Lopez den asayatsü jangjaogo, Djokovic joko taruba ita French Open asayatsüba atema renemshitsüsa akümtsü.
Kasa mapang nung Kei Nishikori iba asayamung mezüngbuba asaya nung Spain nunger Guillermo Garcia-Lopez den asaya tembanga masayateti tuguadok. Nishikori, shiba Monte Carlo Masters final nung Rafael Nadal-i tsükdaktsü pai mezüngbuba set 6-3 agi makokba sülen asaya nungi tuguadok.
Pa teka tachichilen timtema aliba ajanga iba asaya tema masayatettsüsa aküm.
“Monte Carlo nung Nadal mokokaka kü timla tali aküm,” ta Nishikori-i asaya temer osangbenertem dang ashi.
“Ajisüaka mezüngbuba set nung kü teka jangramedemi aküm aser ni risk kecha maginü,” ta paisa ashi.
Maneni Asia nungisa asaya Hyeon Chung, shiba taküm Australian Open semifinal tonga asayaogo, paa iba asayamung metenzükdang yiruba ajanga shilem magitettsüsa aküm.