Putu dak mapetba ozüng

Nagaland nung alir Naga nungertem yabo Nagaland state mangu dang nungi tanü tashi sepaitem yimsüsüba kübok alir ama lia arudagi. Tanü arishia alir tsüraburtemiang taoba küm 60 shi jakdang Assam police-temi Naga nungertem merenshia tenzükba nungi Indian army-temi Naga nunger reshikangshiba mapa tamajungtem aika ajangshia aruogo. Parnok asoshi item tatalokbatemji tetsübutsüka aser temulung ashitsüka lir. India nunger sepaitemi Naga nunger dak maochii inyakba mapatem ajakji Naga nungertemi India kübok melinüba ajanga atalokbatem liasü. Tanüa kasa sepaitem tashi kübok asenok alir saka asenok dak  sepaitemi inyakba ajanga lendong timtem aser maksü majuru tashibo asenoki asenok ya India sepaitem kübok alir ta memetetter. Ajisüaka, kodang sepaitemi asenok anema parnok nem tashi balaka agüja aliba ozüng Armed Forces (Special Powers) Act nung shia aliba ama inyakdir, idangjibo asenok agi matitsü. Iba ozüng yagi sepaitem nem mashi ki ka lapoka mittsü mesüra amaktsü tashi agüja lir. Ano tebilemtsü kaji, sepaitemi asenok dak temulung melemi bilemba kija agi parnoki asenok kasettsü akok saka iba tatalokba ken o ji India nung kecha okadaka benoka jembitsü makok. Tetezü, temulung malemba kija agi nisung kaseta yutsütsü temeten aser temelaba tashi India sepaitem nembo agüja lir. Iba ozüng ya tamalen Tripura nungi agienogo aser tang Meghalaya nungi agiener aser Arunachal Pradesh nunga tesem kar nung agienogo. Ajisüaka, Nagaland nungbo iba tetsübutsü ozüng ya ano maneni alitsü. Tanü Nagaland state tensa reprangdangra, akhi ama masü tesünep nung lir, kechiyong Naga nunger telongpur telok teimbaka den India government-i yimjung lapoka lir, anungji iba ama ozüng tesashi amshitsüsa sepaitem nem tashi balaka agütsütsü menüngdaker. Ajisüaka, tsüraburtemi tashi mangar tanurtem dak azüktsü jarong nateta ayu ama, nüngdak nung amshitsü asoshi India government-i iba ozüng ya Nagaland nungibo magieni ano ayur. Atangji, Naga yimten tebilemtsü ken o matemba den ano telongpur telok ajak denbo yimjung nung mali asünungji, iba ozüng tamajung tesashiji Nagaland nungbo nüngdak ta bilemer südi. Ano asenok daka tashimait kaji, kodangsa iba ozüng ya amshia sepaitemi lendong timtem agütsür, idangji dang asenoki iba ozüng anema ola adoker. Idangjibo, tesem ajaklen lokti senden ayongzüka Armed forces (Special Powers) Act ya tangsa Nagaland nungi agientsüla ta jembitsü saka senden temer amadoker. Ashi, iba amaji mesüi kari dang pei nübo aser rongsen tenla agüja Nagaland nung alirtema iba ama ozüng tamajung nungi jenbutsüsa inyak asübo jungla. Taoba küm semer jakdang, Naga Peoples’ Movement for Human Rights purtemi iba ozüng ya Naga nunger lushi ajunga nungi agientsüla ta okadak ken o agüja lir, ajisüaka, tang tashi iba ken o nungjia obendang menguteter. Atangji, Nagaland nunga linük temzüng ozüng anema inyakertem  asoshi ozüng tesashi nüngdaker saka temulung melemi bilemba kija agi injang bomb amshia ki amaktsü aser nisung kaseta yutsütsü aser iba anemaji kecha ken o okadak benoktsü makok ta asüba ozüngjibo menüngdaker. Ano külen, India government-ia bilemdangtsüba kaji, ozüng tesashi amshia Naga nunger anema taochi makai inyakba agi Naga yimten tebilemtsü koktettsü asübo alemli koker lila. Alima nung ya koba mapa nung südir süang, ozüng tesashi agi masü saka tangatetba agi alir, anungji temulung melemi bilemba kija agi kaseta endoktsü ta amokmerenba dang nungibo yimjung nung tangatetba agütsütsü merangba tajungba asütsü. Ashiko, joko Naga yimten ken o tatembang küma arua jembitettsü amai bilemba agi, idangjiang tanga tebilemtsü den külemi iba Armed Forces ozüng ya dena agientsü bilema alitsüa akok. Ajisüaka, Naga yimten tebilemtsü ken o ya latetang telatet, iba ama meimchir taküm aser temeten anema kenyongi maochii inyaktsüba ozüng yabosa agientsüla. Ibai tanü putu daka dena mapeter.