P. Renthy Jamir aser I. Panger Jamir nati Kaket ka saya

Changtongya, April 26, 2018 (TYO) : Tanü Nüngshi Reju (Community Hall) Changtongya nung P.Renthy Jamir, Rd. Assistant Director, IPR Department aser I. Panger Jamir (IFS), Principal Chief Conservator of Forest (PCCF) & Head of Forest Force (HOFF), Nagaland nati züluba “Changtongya Nüngshi Yimkong Penzü” kaket ka saya liasü. Iba sentong nung jembidang P.Renthy-i tsüraburtem lipok otsü metetertem joko aika mali, anungji parnok masüdang yim otsütem wazüka ayutsü asoshi iba kaket ya zülu ta shia liasü. Iba kaket ya Changtongya nungertem asoshi dang masü saka Aor arok asoshi tajangzük aliba kakat ka lir ta paisa shisem.
Kaket adokba indangsa jembidang I.Panger Jamir-i küm aika tejaklen nungi aki tetsü-tebou sobaliba aser otsütem kaket ka nung adoka ayutsü jangra bilem, anungji küm ter (10) shi iba kaket asoshi inyaka aru. Yimten yimli aser sobaliba indang kaket zülutsüji tasak, kechiyong iba ajanga timtem aiben adoker saka lanur asoshi sobaliba angazüktsüji kaket tajungba kechiaser parnoki tetsü tebou dangi oa otsütem angazüktsü mapang peria mangur, ta paisa shia liasü.
Iba sentong nung I. Kümzük Lkr, Changtongya Village Council Chairman-i sentong lemsa, Rev.C. Manen, Pastor, NCRC Changtongya ajanga temoatsü meshia sarasadem. Rev. I. Wati Jamir, Pastor Changtongya Baptist Church ajanga iba kaket sayatsü aser Tiasunep Longkumer, tatar ajanga tepela o jembia liasü.