AKM & DBM-i student admission agütsür

Mokokchung, Rongchii 26 (TYO) : Ao Kaketshir Mungdang (AKM) aser Divine Bridge Ministries (DBM) kübok AduAide Career & Counselling Service longjemer India tesem balala nung asen Naga nunger kaketshirtem, tongtibangsa asen Aoer lanur tazüngertem University, colleges aser Institution balala nung Admission bushiba mapatong nung angati teyari 2015 kum nungi agütsüa arudagi.
Tanü lanurtem aika class ter (10) aser ter ana (12) pass sür tazüngtsu asoshi lemang sadema mongui alidang AKM & DBM longjemer lemang balala sayua pa/la shidakba tazüngtsu tetoyuba agütsür. Iba den külemi lanur ka dak aketba sempet aser shisatsü asadanga Counselling & Guidance balala agüja pa/lai akoktsüba lemang tem sayua yaria arudagi. Tongtibangsa rongsen nung timtemer lanurtem asoshi scholarship bushija aser fees tajemba nung meshija college balala nung admission agüja yaria arur, ta DBM ajanga sangdong ka nung metetdaktsü.
Anu maneni tanü middleman mesüra tesem aika nungi telok balala ajanga parnok ajangzüktsü mechi tazüngtsü nung totuyuba tai agütsüba aser lemang tai sayuba ajanga lanur aika taküm raksar aser tsürabur tem rongsen jenti intoker. Anu aiben Recognized masüba college tem nung admission agütsür. Anungji item tim masüba mapa ajak nungi kümzüktsü mechi AKM aser DBM longjemer iba mapa ya inyaker. Tejangrar temi Admission form AKM office Mokokchung aser DBM office Dimapur nungi agiang, ta kasa sangdong ajangasa metetdaktsü.