Monupii 3 nü SC-i SC/ST onük nung obendang reprangshitsü

New Delhi, Rongchii/April 27 (Agencies): Scheduled Castes and the Scheduled Tribes (Prevention of Atrocities) Act (SC/ST Act) ozüng yanglushia Supreme Court-i obendang agutsüba sülen Centre sorkari iba obendangji reprangshitsü atema mepishiba ama Monupii (May) 3, 2018 nü Supreme Court-i iba onük reprangshitsü.
Attorney General, K K Venugopal-i Justice ana- A K Goel aser Deepak Gupta nati akumba bench dang iba onükji tekaraba nung angadangtsü atema mepishia liasü.
Sorkar tenüng nung jembir Attorney General-i, “Tatembangbuba order nung tatembangbuba oren ajanga, tezüluba nung agutsüba sülen file süogo ta shia lir. Ni tezüluba nung agutsüogo. State pezüia iba obendang reprangshitsü atema temepishiba agutsüogo. Onok nem anogo ka latetjang,” ta SC bench dang mepishia liasü.
Iba nungji ajemdaker Justice Goel-i, iba onükji taruba hopta angadangtsü ta shia Monupi 3 anogo lateta ayu.
SC/ST Act kübok tai tonglokja alir ka idangyongjisa apuba temeden agiena SC-i obendang agutsüba anema Rongchii (April) 2, 2018 nü Centre sorkari Supreme Court dang iba obendang tanaben meyipa reprangshitsü atema mepishia liasü.
Sorkari Supreme Court dang, Metsüremi (March) 20, 2018 nü obendang agutsüba ajanga SC/ST nisungtem atema linük temzüng nung Arrla 21 nung lateta aliba alema inyaker asütsü, ta ashi.
Taoba ita Supreme Court-i, iba Act kübok ken o benokba sülen idangyongjisa tai tonglokja alir ka aputsü makok, ta obendang agüja liasü.
SC-isa, iba Act kübok ken o benokba sülen iba ken o ji shidak asü masüar jangjatsü atema police-i tama bushisüngdangtsü, ta obendang agütsü.
Ano iba Act kübok public anema ken o ka benokra iba district nung Senior Superintendent of Police-i tama bushisüngdangtsü, ta SC-i metetdakja liasü.
SC-isa, item ama ken o nung sorkar ketdangser ka mapudang tamasa senior ketdangsertem dang nungi temelaba agitsüla, ta SC-i metetdakja liasü.