Totzü jenjang anema CPM-i India tesem ajak nung longkak aittsü

New Delhi, Rongchii/April 27 (Agencies): Sorkari petrol aser diesel nung jenjang atutsü telemtetba agiba anema CPM-i party units ajak dang Monupii (May) 8, 2018 nü India tesem ajungalen longkak aittsü tetuyuba agutsüogo.
Petrol aser diesel retail price atuba anema Left party-i, iba ya ajanga sensakertem taküm nung kongshitsü aser nüngdakba osettsüset ajak nung jenjang atutsü, ta ashi.
CPM-i sangdong ka ajanga, “CPM-i Centre sorkar dang nüburtem khuret pungbatsü atema tangsa jenjang alutsü takhangba agütsür. Politburo-i par units ajak dang Monupii 8, 2018 nü India tesem ajunga nung longkak aita saru ajemtsü atema takhangba agutsütsü tuyuogo,” ta metetdaktsü.
Kasa sangdong ajanga, “Iba ya nüngdak, kechiyong Centre sorkari linük nung tongti corporates dangbo saru sen lakh crore aika atoker. Petrol aser diesel naprong tang jenjang timba lir. Party-isa tanga democratic party tem aser nübur meimba forces danga longkak aitba nung shilem agitsü ayongzüker,” ta metetdaktsü.
Totzü nung jenjang kanga atuba ajanga India nung petroleum products ajak nung retail price aika kümogo, aser ibaji South Asia nung timtiba asütsü,” ta CPM-i ashi.
Parnokisa, tesüiba küm pezü tsüngda petrol litre shia nung excise duty (saru) sen 9.48 aliba nungi tangbo sen 19.48 kümogo, ta ashi.
Iba denji kasa diesel nunga litre shia nung excise duty 3.56 aliba nungi tangbo sen 15.33 kümogo, ta parnokisa ashi.