NSF Martyrs’ Memorial Trophy Sept. 16 nü nungi asayatsü

Kohima, September 02 (Agencies): Nagaland nung ayonga asayaba tongti football asayamong, 16 buba NSF Martyrs’ Memorial Trophy tan September ita 16 nü nungi tenzüka Kohima kübok Local Ground nung asayatsü renemba osang ka asayamong tayonger, Angami Students Union (ASU)-i tanü Bodbar nü metetdaktsüogo.
Asür kaketshir lenir ana, Kekuojalie Sachü aser Vikhozo Yhoshü na nüngtem nung ayongba asayamong ya ‘Goal for Peace’ omen nung ajemdaker ita ka agia asayatsü renema lir.
16 buba NSF asayamong asayatsü renemba osang ya ASU tenüng nung Organizing Committee Convenor, Vipopal Kintso aser ASU Tir, Dievi Yano nati tanü osangbener den ajurutepdang metetdaktsü.
Taoba mapang nungi timba küma ajungketter külen tan asayamong nung mezüngbuba jenjang anguba telok nem senpet sen lakh 1.6, tanabuba jenjang angur nem senpet sen lakh 1 aser semifinal o quarterfinal na nung shilem agitsü jenjang anguba telok shia nem senpet sen 20,000 aser 10,000 agütsütsü renemba osang ka Kintso-i metetdaktsü.
“Best defender, best custodian, highest scorer, best midfielder nunger densema individual shilem indang sempeta agütsütsü renemba den külemi, player of the tournament takokba angur nem scooty ka agütsütsü renema lir,” ta pai ashi.
Iba asayamong nung shilem agitsü jangrartemi Kohima nung ASU Office, Sports World aser Zumvu Printex nungi aser Dimapur nung Kiran Sports nungi asayamong nung shilem agitsü shiti angutsü aser kasaji temonoba agi tan September ita 11 nü tashi nung ASU ket tongtsütsüla ta pai metetdaktsü.
Ano, iba asayamong den sentakba fixture tan September ita 12 nikongdang 2:00 ako nung Kohima Local Ground nung renemtsü sentong lir ta paisa shisem.