Tasüba temerenshi !

Alima nung nisung ka asoshi tasübaji tatembangba, anungji ozüng raksar aser mapa tamajung inyakertem nema obendangertemi akok tashi taochi sayua tasüba temerenshibo magütsütsü meranger. Ibayongji, nisung tepsetba maparen nunga aiben tasüba temerenshi masü saka taküm piyong tepuokdak ayutsüba temerenshi dang agütsür. Asenoki metetba tashi nunga India nung obendangertemi aibelener nem tasüba temerenshi agütsübaji yimmaker bendanger tsükchir aser tongti yimsüsür tepsetertem kar nem agüja lir. Iba dakji alakabo tashiyim agi nisung taküm raksatsüba mesüra samatsüba atemabo tasüba temerenshi agütsübabo mebilemtetter. Tang tashi nung alima kin tenem dak tali nung tasüba temerenshi agütsür aser itemji talisa Africa aser Muslim limatem nung amshir. Atangji, US aser India ama nunga tasüba temerenshi agütsür saka item ama limatem nungbo temzüngi melaa liaka akok tashi magütsütsü meranger. Ibayongji, nisung aikati tashiyim agi tangar anema inyaktsü tsübua mebilemer südi. Pei mapa agi langa alirtem nembo tasüba temerenshi agütsütsü melaa aliba alima kintem rongnung tasüba temerenshi kanga bolua agütsüba limatemji China aser Iran limatem asütsü. Item limatem nungbo government anema ola adokba asoshia kecha nungnanga melii  tasüba temerenshi agütsür. Ibaji kanga majung aser meimchir taküm alitsüba temeten anema lir.  Ibayongji, alima kintem aikati alima kecha nunga tasüba temerenshi yabo malitsüla ta ola adoker. Ibajia shitak lir, kechiyong nisung taküm kaji khen dang alitsü aser iba takümji tepseta endoktsübajibo Tsüngrem anema inyaker amato asütsü. Ajisüaka, tanü India nung teburtemi tashiyim agi tila tanur tetsür dak tashi tashiyim agi maksütsü mapa inyaker külenang, ano tepseta endokba mapatem atalokpet atalokdang kanga jashia bilemer aser item tashiyim mapa tamajung inyakertem nemjibo tasüba temerenshi agütsüba agia temulung masür. Iba ama kin ka nem maksü bener arutsür külenang ano nisung tepseta endokba mapatemjibo taremzüktsüla mapa masü, anungji tatar senden nunga benoka mejembiaka, iba ama maksütsü mapa tamajung inyakertem nem tasüba temerenshi agütsütsü atema tatar tazüngpurtemi lemtetba nung India tiri temelaba agütsüogo.Ajisüaka, tebilemdangtsü kaji, tang linük nung tasüba temerenshi agütsütsü lemtetbaji tashiyim agi tetsür anema mapa tamajung inyaker ajak nem masü saka küm terpezü teküpbok tetsür chanutem anema inyakertem asoshi dang lir. Ibayongji, aikati iba tasüba temerenshiji tetsür chanutem anema inyakba asoshidang masü saka tetsürtem rongnung tanur tain kecha mebendangi tetsür anema inyakba temerenshi asütsüla ta akanger. Atangji ajia shitak, kechiyong tetsürji tetsür aser taküm raksatsüba nung tanur tain kecha mali teraksaji teraksa. Iba jagi asenok rongnung bilemdangtsü atema taoba hopta nung ” tetsür dak tashiyim agi mapa tamajung inyaker nem tasüba temerenshi agütsü nunga koma süla ?” ta tasüngdangba ka agütsüogo. Atangji, aikati tasüba temerenshibo magütsüang tajungba asütsü kechiyong iba ama ozüng tesashi lateta yutsüba agi tai maketba teburtema lendongi aitsü ana nung lir ta shisalemsatepogo. Ibaji angatetba agi, yimsüsürtemia tasüba temerenshiji tetsür taintem anema inyakba purtem asoshi masü saka tanur tila aser tetsür chanutem anema inyakertem asoshi latettsü südi. Shisalemsatepertem kari ashiba ama, tetsür tain karibo teburtem ashiokja lendongi idaktsütsüa akok, saka tanurtemibo tiyazü agi tangar dak tai tonglokjabo meinyaktsü. Iba tangatetba nung tang linük nung latetbajiang shitak asütsü ta bilemer. Ano, asenoki angatettsüba kaji, tebur kati tetsür ka dak tashiyim agi mapa tamajung inyakba agi tetsürla kijaji maksüja taküm raksatsür masü saka tebursang asoshijiang maksu tuluba lir. Aiben teburtemi tetsürtem anema tashiyim mapa inyakbaji tetsürtem jakla yimya majungba ajanga ajuruba timtem lendong ama jembir. Ajisüaka, jungjunga bilemdangra itemji tetsürtem majungba agi masü saka teburtem mazüokba ajanga ataloker. Iba tangatetba nung tebur shiai pei taküm ya ozüng nemji dang masü saka peisasa pei taküm azüoktettsüsa alitsü tim.