Finance Department-i ketdangsertem den tepila sentong ka ayonga agi

Kohima, Rongchii/April 30 (TYO): Rongchii/April 30, 2018 nü Finance department-i Department’s conference hall nung department nung ketdangser ana- Additional Secretary (N.S.S), Chubakatila Jamir aser Joint Secretary (N.S.S), Kekhwezo Kepfo na nüngtem nung tepila sentong ka ayongzüka agiogo; tena sorkar tenzükba mapa nung küm 35 abensar mapa nungi anisüngzükogo.
Tepila sentong nung jembidang OSD, (General), V.Kezo-i, ketdangser anaprong taküm anema lia mapa nungi anisüngzükbaji temoatsü tulu, ta ashi.
Pai ashiba agi, Kekhwezo Kepfo den külemi mapa inyaknütsüsa pa dak melungso lir, pai külem tenzükertem ajak akhümtsüua liasü, ta ashi.
Kezo-isa, Chubakatila Jamir ya mapa nung kanga tenendak aser kanga meranga inyakba ketdangser ka lir, ta ashi.
Secretary, Finance Department, Kikheto Sema, IAS-i, ketdangser anaprong mapa nungi anisüngzüktsü metemsü, kechiyong tenaprong shi nung aser shisatsü nung kanga anema lir, ta ashi.
Paisa, Finance Department nung küm 30 tenzüka arudang pai Kekhwezo Kepfo den külemi jangratema inyaksemogo, aser pai kodanga tangar mapa mashishi, ta metetdaktsü.
Paisa, Kepfo-i pa dang temaba ketdangser aser pa kübok aliba ketdangsertem ajak akhümtsübu, ibaji ajaki angazüka benshitsüla, ta ashi.
Kikheto Sema-isa, Chubakatila Jamir-i mapa kanga nendaka meranga inyak; lai odiodia jembi aser mapa jeta inyak, ta ashi.
Kasa sentong nung jembidang Adviser Finance, R.C Acharjee-i, mapa nungi anisüngzüker ketdangser anapronglai department atema mapa tajung aika inyakba atema pelaba lemsatepba den külemi salem lemsatep.
Mapa nungi anisüngzüker ketdangser anatia Tsüngrem nem tenüngsang agutsüba den külemi tena nüngtem nung tepila sentong ayongzüka katsüba atema pelaba lemsatepa liasü.
Tenatisa, Finance Department nung inyakba piyong staff temi amalitepa inyakba atema pelaba lemsatep.
Iba sentong ya Joint Secretary, Bodeno S. Colo leniba nung agi. Department tenüng nung sempet agutsüba sülen loktii sarasadema sentong tembanga liasü.