Longkak aitba ajanga crore 25,000 shi takoksa aludaksüogo: Assocham

New Delhi, September 02 (Agencies): Tanü Bodhbar nü India ajunga nung longkak aita mokdangba ajanga sen crore 25,000 shi takoksa bener arutsüba osang ka Associated Chambers of Commerce & Industry of India (Assocham)-i metetdaktsüogo.
“Tanü longkak aitba ajanga India rongsenkettsüng nung sen crore 25,000 shi takoksa bener arutsüogo. Tanü mapa inyakertemi mapai moi longkak aitba ajanga shishilembabaren aser nübur anir senzüsenbongba nunga takoksa tulu bener arutsüogo. Ano, bank nung mapa inyakertemi par mapa meinyaki maneni longkak aittsü renemba yong tarutsü anogotem nung takoksaji taliba akümtsü,” ta Assocham Secretary General, D.S. Rawat-i ashi.
India Ato Kilonser, Narendra Modi-i küm ka tejaklen lenisüba menden benokba sülen tan mezüngsüa India ajunga nung industry aser office nung mapa inyakertemi mapai moi longkak aitba sentong agiogo.
India ajunga nung bank, insurance company aser sorkar o nijai ketdang asüba factory jenti tanü shibanga longkak aita liasü.
Tanü longkak aitba sentong nung transport union aser shishilembartemia shilem agiba yong kaket reju jenti shibangtsüsa akümba den külemi sorkar office-tem nunga mapa inyaker kanga dang ajema aliba osang bushitetogo.
Tanü longkak aitba ajanga anogo shia aayangertemi timtem tuluba ajuruogo ta shia, “India ajunga talisa, industry-i nüngdakba tajangzük angutsü asoshi sorkari mapa inyakertem den sentakba temelenshi tajung bener arutsütsüla,” ta Rawat-i metetdaktsü.
Tanü longkak aitertemi mapa inyaktsü den sentakba ozüng yanglushiba agientsü, mapa inyaker shia nem ita shi tajemba agi sen 15,000 agütsütsü aser public sector unit-tem nija nisung mesüra tentet nem ketdang mesüdaktsütsü densema ajak agi takhangba onük 12 tashi benokba osang jangjaogo.