Governor Acharya-i shisaliok rejutem ayongzük

Dimapur, Rongchii (April) 30 (TYO): Alima nung lanurtem kanga nüngdaker saka nüngdakba ama parnok nem shisatsü agütsütsüla. Anungji, shisaliok rejutemi kaketshirtem ya mapa bushirtem masü saka mapa agütsür ka ka kümdaktsütsü merangtsüla, ta Governor PB Acharya-i ashi.
Kohima Science College, Jotsoma-i Rongchii (April) 30, 2018 nü “Natural Resources, Skill Manpower and Development of Northeast” regional seminar ayongzüka agidang PB Acharya-i iba olen jembi.
Shisaliok rejutemi curriculum nung skill course tem enoksemtsüla, iba jagi kaketshirtemi entrepreneurship agitettsü. India sorkari kaketshirtem yaritsü atema Mudra scheme tem tenzükogo aser iba ya talisa sensaker kaketshirtem entrepreneurs kümdaktsütsü nükjidong nung tenzükba lir, ta paisa ashi.
Tetoktepba agi sünger aliba alima nung kaketshirtem tasü aittsüla aser tengatetba melenshir entrepreneurship inyaktsüla. Sorkar mapa peria mali aser Nagaland nung tazünger ajak nembo sorkar mapa magütsütettsü, ta Governor Acharya-isa shisem.
Sentong nung Addl. Director, Department of Higher Education, Dr. I. Anungla Aier-i okila jembidang, Northeast nung takar tesem ka lir aser iba tesem nung nübo aser ali rongsen peria lir, saka skill shitak maliba ajanga timtemer, ta ashi.
Terenlok bener arutsü atema asalentong aser ali rongsen ketdangsüba tesentaktep majungba ajanga linük aika nung timtem ajurur. Asenoki terenlok aser ali rongsen timi amshitsüa aser ibaji ajanga asenok ajangzüktsü, ta Dr. I. Anungla-isa ashi.
Iba sentong nung shisalen sayurtemji- Professor Sapu Changkija, Department of Genetics & Plant Breeding, SASRD, Medziphema, Neichute Doulo, Chief Executive Officer & Co-ordinator, Entrepreneurs Associates aser Amba Jamir, Founder & Executive Secretary, Sustainable Development Forum, Nagaland nungertem liasü.
Sentong nung mendenji Dr. Seyiekhrielie Whiso, Asst. Professor, Department of English, Kohima Science College, Jotsoma liasü aser Wenyitso Kapfo, Asst. Professor, Department of Botany, Kohima Science College-i ketdangsüa panel discussion agi.