24×7 Light

Akhidangbo kidang light mesangokbaji aonung tesangwa atema dang liasü, ajisüaka tanübo ken angaba nungi tenzüker, computer amshiba, bangka agiba, TV reprangba, sorochiokba aser sü shidokba densema mapa timbaka electric tashi ajangadang inyaker. Ajisüaka yaküm-yanü tashi India nung yimtsüng 18,452 nungbo electric light mesangoka malibaji akhi tetsü-tebou nunger mapang ama tia ka nung dang lia aruogo ta bilemer. Kanga menor süaka India linük nung tanüngba yim 18,000 nungjia light mesangokja joko linük nung light mesangoka maliba yim kata mali, aser iba ya linük terenlok nung alizüng tulu ka tongtetba asutsü. Aji oda süaka yimtsüngtem nung aliba kibok shia nung light connection magi tashibo aser light current junga magütsü tashibo tongbang tesadang ka dang akokba ama züngshitsüla. Yimtsüng ajunga nung light mesangokjaka statistics ajanga ashiba agi, light mesangokja aliba yimtsüng kar nungbo kibong shilem 10 dak tajemba nungang light mesangoka lir aser anogo nung light ghonda ishika dang arur. Taküm Aenjeti (January) ita Mizoram nung aliba yimtsüngtem nung anogo nung light aruba average ji ghonda 11.5 dang liasü aser Haryana yimtsüngtem nung ghonda 14.91 shi dang liasü. Ano Kerala aser Tamil Nadu state tem nungbo anogoshia light aruba average ji ghonda 24 tashi liasü. Sangküm Rongchii/April 1 tashi nungbo India kübok state aser UT ajak nung ajak asoshi light mesangoktsütsü, ta sorkari atemzükba nükjidongbo atalokogo. Sorkarisa India nunger nüchiso ngur küm 75 ajungba küm, 2022 küm tashi nungbo ajak nem light methitemi, 24×7 agutsütsü atemzüka lir, saka ketdangsertem inyakyim memelenshira aser nüburtem tangatetba memelenshira Central scheme balala ajanga teyari agutsüyonga iba nükjidongji pongmang ka dang asütsü. Asen state sasep nunga iba nükjidongji (24×7) ataloktsü atema Power department nung ketdangsertemi anir asentenshia asalentong balala benoka inyaktsüla, iba denji külemi nüburtemia light auyaa matsüktsüla aser light ochishia atsükertemi light kanga meyaka atsükba den light bill shidak agutsütsüla. Tanü asen lima nung kisetshiruru auyateper, kima osettsüset ayu majung, gari anena ayu majung, Tenla kima dena gari anena yur arendakba putu ka nung asenok alir. Yamaji asen lima, talisa Dimapur ama yimti nung tamangertema aikati light auyaa tsüka alitsü südi mesüra light bill shidak magutsüi alitsü; item kuliji ajanga asen lima merenloker. Asenok Naga nungeri sen meyaka amshi mashi, kechiyong asenok aikati nüngdakba dak alaka senotsü tera tali lira iba yariji indoker. Iba denji kasa asenoki pei kidang süng tali atsüker, tzü tali agir, gari nung totzü tali atsüker aser light nüngdakba dang nungi tali atsüker, ibayongji peritsü agi meperir aser tatem nungbo asenoksa okronger. Talisa light atsükba tsütsü asenok ajaki molamoshia masü saka nüngdak yari atsük nungbo light manguba tebilemtsü asenoki majangshitsü. Power department-i kümkümshir light auyaa atsükba anema inyaktsüla, ozüng küma CFL light amshidaktsütsüla, transformer meraksadangyongi yanglushitsüla, tamper mesütetba metre box amshidaktsütsüla aser asalentong balala benoka inyakdangtsüla. Power ketdangsertemia aser nüburtemia tangatetba tajung nung pei teinyaktsü shilem inyak nungang 24×7 light nükjidongji asangsang nung ataloktsü.