Supreme Court-i Himachal Pradesh ketdangser tepsetba ken o benok

New Delhi, Monupii (May) 2 (Agencies): Himachal Pradesh kübok Kasauli nung assistant town planning officer ka khasetba ken o Rasemnü (Bodbar) Supreme Court-i parnok sasa ken o ka benokogo.
Iba ken o ya bench ka nem lemzüktsütsü atema Chief Justice of India Dipak Misra tsüngdang benoktsüla ta Supreme Court-i ashi.
Iba lendong ya kanga dang süoki ia agitsüba tatalokba ka lir aser Assistant Town Planner Shail Bala Sharma dak injang khaloktsüsang Narayani guest house owner, Vijay Thakur-i SC-i tuyuba anema mapa inyakogo, ta Justice Madan B Lokur aser Justice Deepak Gupta nati ashi.
Shail Bala Sharma ji SC-i tuyuba mapa inyaktsü atema Kasauli-i ao aser nisung tepsettsü süra okadaki tetuyuba kecha magütsütsüsa akümtsü, ta tenatisa ashi. Bench-isa CJI Misra dang iba ken o asüng agizüktsü atema mepishi.
Sangtennü (Mongulbar) Himachal nung ozüng alema yangluba hotel 13 bendoktsü atema mapa inyakdang Sharma aser Thakur na obang meputepi raratep aser idangji Thakur-i Sharma khaset.
Yashi nikongdang 2.33 ako meta Mandudhar nung aliba Narayani guest house telung nung Thakur-i Sharma dak injang asem shi khaloktsü ta tenük kuli agütsürtemi ashi.
Sharma ji Dharampur government hospital-i anir oa saka la süadoka liasü. Iba tatalokba sülen Thakur jena ao aser police-i pa aputsü atema osang sangoktsür nem sen lakh 1 senpet agütsütsü ta metetdaktsüogo.
Iba tatalokba nungsa Public Works Department mapa inyaker, Gulab Singh yiru aser pa Chandigarh nung anepaludar, ta police-i metetdaktsü.
“Sharma aser tanga ketdangsertem hotel telungi aidang Thakur-i injang khaloktsü. Pai hotel telung nung injang anaben khatok aser idangji PWD mapa inyaker ka yiru. Onok kimai asema alu saka pai (Thakur)-i onok arshia kimai alu aser injang ka khaloktsüdang ATP dak kongshi, la ali nung lao” ta Parwanoo Range Officer Shivender Pal Singh-i osangbener dang ashi.
2000 küm Thakur-i arms licence ka agizük aser pai revolver ka ali, ta ketdangsertemi ashi.