Alima nung mopung temenentiba aliba linükji India lir

New Delhi, Monupii (May) 2 (Agencies): World Health Organisation (WHO)-i Geneva nung alima nung mopung temenentiba yimtitem tarensen metetdaktsüba nung mopung temenentiba yimti 15 nungi India nung 14 dena lir.
Mopung temenentiba yimtiji Kanpur lir aser iba yimti sülen Faridabad, Varanasi aser Gaya lir.
India nung tanüngba yimtitemji Delhi, Patna, Agra, Muzaffarpur, Srinagar, Gurgaon, Jaipur, Patiala aser Jodhpur tem lir. Item yimtitem sülen Kuwait nung Ali Subah Al-Salem yimti aser China o Mongolia nung yimti kar dena lir.
Alima nung mopung temenen aliba yimti jenjang pezübuba nung Mumbai lir.
Alima nung nisung 10 rongnungi 9-i mopung temenen sashir aser küm shia nisung million 7 outdoor aser household air pollution ajanga asür. 2016 küm temeket nung mopung temenen sashiba ajanga nisung million 4.2 shi asü aser kasa mapang nung household air pollution ajanga nisung million 3.8 asü, ta WHO report nung shia lir.
Alima nung mopung temenentiba aliba yimtiji Delhi masü saka iba ya tepelatsü osang ka masü.
Public-i iba khuret atema ola adokaka aser Centre o Delhi sorkartemi iba tebilemtsü atema mapa inyakaka, 2010 aser 2014 tsüngda tera ajungba dak alaka, 2015 küm nungi tamajungba kümogo.
WHO indang tesüsabuba asadangbaji 2016 küm indang lir aser iba nung Delhi jenjang trokbuba nung ang lir, saka Delhi nung PM 2.5 annual average ji 143 micrograms per cubic metre lir aser ibaji national safe standard dang nungi asemsü agi teimba lir. Ano, Delhi nung PM 10 average ji 292 micrograms per cubic metre lir aser ibaji national standard dang nungi 4.5 agi teimba lir.