Manipur nung Curfew agiena liasü, internet anenja atar

Imphal, Sept 02 (Agencies): Manipur, Churachandpur district anüolentip tsütsü rara adokba tesem nung aliba nüburtem shishilembatsü asoshi Bodhbar nü curfew agiena liasü, iba den külemi mepetmesü adoktsüsa olulu prokba nokdangtsü nükjidong nung ketdangsertemi Mongolbar aonung nungi internet services agienogo.
“Nüburtem nüngdakba chiyungtsü/osettsüset alitettsü asoshi tanep (Bodhbar) 5:00 ako nungi curfew agiena liasü,” ta Churachandpur district magistrate, Lunminthang Haokip-i metetdaktsü.
“Tang tashi nungbo mepetmesü tasen adokba osang mali, ajisüaka onoki tensa junga mita atadar,” ta paisa ashi.
Ajisüaka district nung kaket rejutem aser sorkar office tembo shibanga liasü.
Manipur sorkari tongtibang Bill asem- Protection of Manipur People Bill 2015, Manipur Land Revenue & Land Reforms (seventh amendment) Bill 2015 aser Manipur Shops & Establishment (second amendment) Bill 2015 agizükba sülen Hombar nikongdang rara adoka tajemba agi nisung ti süogo aser nisung 30 dak tema yiruogo.
Item Bill tem ya All Tribal Students Union Manipur (ATSUM), Kuki Students Organization (KSO) aser All Naga Students Association Manipur (ANSAM) temi magizüker.
KSO otongdar Minlan Gangte-i, “Manipur Land Revenue aser Land Reforms Act yanglushiba ajanga liso nüburtem temeten agienogo. Onoki (tribal nüburtem) sorkar dang mepelar, talisa iba Bill agizükba mapang onoki shimba MLA temi ola madokba atema mepelar,” ta ashi.
Hombar nikongdang loktii Health & Family Welfare Minister Phungzathang Tonsing aser Outer Manipur Lok Sabha züngsem Thangsoi Baite na densema Congress lenir ki pongu amak. Iba mapang nungji parnokbo kidang maliasü. Ano loktiisa Mongolbar nü Churachandpur jila nung police station ka rongtoktsüba mapang police-i injang yokdang nisung asem asü.
Item Bill anemba dak sentakba nung chief minister Okram Ibobi Singh meyong secretary Ashok Kumar-i, “Item Bill tem nung aliba ozüngtem junga meratetba aser merajemba ajanga item tatalokba ya ataloker südi, koba ajanga nisung taküm densema takoksa jenti aludaktsür,” ta ashi.