SSA tesayur 2500 dak temai lungkak aiter

Kohima, Monupii (May) 2 (TYO): Nagaland nung SSA tesayur 2500 dak temai itasen den 7th Revision of Pay (ROP) agüjang ta takhangba agüja tanü nungi pen down strike tenzükogo.
Parnoki Rongchii (April) 23 nü Department of School Education nem anogo tenetnü latettsü saka State sorkar nungi telangzüba manguba ajanga lungkak aittsüsa akümer, ta Nagaland Sarva Shiksha Abhiyan Teachers’ Association (NSSATA) general secretary, Vinoka Sohe-i ashi.
Taküm Aenjeti (January) ita nungi tenzüker ita pezü indang itasen NSSATA-i meshir, ta paisa ashi.
Tanga state sorkar mapa inyakertem ama Nagaland SSA teachers-ia 7th ROP nung aliba ama itasen meshir. SSA teachers (batch of 2010 and 2013) indang itasen non-plan budget nung dendaktsütsü atema onoki akhanger, ta Shohe-isa shisem.
NSSATA ketdangpurtemi yashi Kohima nung School Education indang Advisor aser department ketdangsertem den ajurutep aser Rongchii (April) 23 nü shidi agütsüba indang onük benoka jembitep saka telemtetba kecha magi. Iba jagi tanü nungi lungkak aitba shilem mezüngbuba tenzüktsüsa aküm, ta Shohe-isa metetdaktsü.
“Onoki anogoshia school-ibo aotsü saka class magitsü. Sorkari telangzüba tajung magütsüra, onoki tesashiba nung lungkak aittsü” ta paisa shisem.
NSSATA-isa züngsem ajak dang telemtetba agiba sülen anidaktsü tetuyuba agütsü.