Party lennir nem Cabinet & State Minister jenjang agütsüba agientsüla: NPRAAF

Dimapur, Monupii (May) 2 (TYO): Nagaland nung party mapa inyakertem nem Cabinet aser State Minister jenjang agütsüba magizüker ta Nagaland Public Rights Awareness and Action Forum (NPRAAF)-i ashi.
State sorkar senotsü khuret tulu lir aser iba ama mapatem ajanga state senpong nung timtem bentsür arutsü. Tang state sorkari inyakba mapaji Arrla 164(1A) nung aliba anema lir, ta Information and Publicity Cell, NPRAAF-i metetdaktsü.
Office of profit nung sen endokba ajema kümdaktsütsü atema parliament nung 2003 küm 91st Amendment Act yanglu. Justice J. Chelameswer, Justice RK Agrawal aser Justice Sapre nungertem adenba Supreme Court bench-i Chiteni (July) 26, 2017 nü Arrla 194 ajanga state sorkari office of profit mapa adokdaktsütsü makok ta jangjangja shiogo. Parnoki iba osang ya Assam Parliamentary secretaries (Appointment,salaries, Allowances and Miscellaneous provision) Act 2004 ji tim masü ta oshidang agütsüba mapang ashi.
Sorkari temelenshi bener arudar ta yimyim ayimoktsüba mesüra garitem nungi lal pati agizükba aser name plate agienba ajanga nübortem kecha majangzüktsü saka nübortem ajangzüktsü atema mapa inyaktsü mepishir, ta NPRAAF-isa metetdaktsü.
Sorkari nisung ka nem jenjang agütsüba inyakyim anentsüla kechiyong iba ajanga Naga nunger rongnung telemsa tali adokdaktsür aser state senpong asoshi timtem talila bentsür arur, ta parnokisa shisem.
MLA tem nem Minister agütsübabo tim dang saka Non-Naga nunger ana dena party mapa inyakertem nem Cabinet aser State Minister jenjang agütsübaji Linük Temzüng aser Naga nunger mezüngmeshiba inyakyim ka lir, ta parnokisa shisem.
Monupii (May) 2, 2018 nü NPRAAF executive council senden nung state sorkari appointment orders meyipa magira, NPRAAF-i linük temzüng aser nübortem kümzüka ayutsü atema iba ken o atema mapa inyaktsü telemtetba agi, ta Information and Publicity Cell sangdong nungsa metetdaktsü.
State sorkarisa 91st amendment anema Advisor tem shimba asoshia tetsükdaktsü ajurutsü, ta parnokisa shisem.