Tenüngsang agütsüba teinyaktsü (T.Ken 113:1-9)

“Kibuba tenüng, iba mapang nungi aser teti tatem maka temoatsü süang. Anü dok nungi anü lu tashi Kibuba tenüng sanga alitsü” (t.2,3).
Item tekong yagi asenok teinyaktsü indang ashir. Mezüngbuba, asenoki Tsüngrem tenüng asangtsüla. Kodang asenoki Kibuba tenüng asangtsü amadokdir lendong lir ta metettang. Shibai anü adokba tobur tajung mesüra anü aiba tobur tajung, tebur tajung metsü tsüngküm anogo mesüra tobur tajung asükwa tsüngküm yanglu, Pa tenüng mesangi itemji pelaa agizüktsü? Asenoki Tsüngrem tenüng asangtsü tetemsü, kechiaser Pai asenok asoshi mapa tulu inyak.
Ano ken züluri anogo ajak nung Tsüngrem tenüng asangtsü ashir, “Anü dak nungi anü lu tashi Kibuba tenüng sanga alitsü” (t.3). Anepdang Pa tenüng sangang. Anogo süidang Pa tenüng sangang. Anüngdang mapa tajung asoshi aser mapa tasak asoshi Pa tenüng sangang. Tia ajak ajanga Pai na reprangba asoshi Pa tenüng sangang.
Asenoki ano alima ajunga nung Pa tenüng asangtsüla- anü adok nungi anü lu tashi jajaba ama. Aikati Kibuba memeteti alir, aikati Kibuba Yisu tekümtet mangatet lir. Parnok asoshi kechi inyaktsü? Asenok alidak nungi kuli asüba ajanga tenzükdi. Asenoki sarasademdi aser agütsüdi. Missionarytem asen teyari nüngdaker. Tsüngremi osang bener Bendang limai na yoktsü akok. Tsüngrem tenüng sanga pei ataba mapa inyakdi.
Ne nem Pa tenüng asangtsü maongka agütsüba nung ne teinyaktsüa dena Tsüngremi ne nem agütsür. Iba kuli nungi na kodanga jena tuo. Nai Pa tenüng asangba agi anogo tepiyong aser alima ajunga süngdakjang. Na anogo shia jajaba nung Kibuba tenüng asangbaji shilem ka kümdaktsür asü ?