Ano Election Ka

Nagaland nung general election tesashi ka agir ita ana sülen ano tang May 28 nü Lok Sabha nung amentsü asoshi tatar ka shimtsü atema  bye election ka agitsübaji Naga nunger asoshi khuret talila ka abener asütsü. Ano, tezüdangtsü kaji, tang May election nung ya shiba shimdir shimaka küm ka asoshi dang asütsü, kechiyong May nungbo tang Lok Sabha nung amener tatartem ajak kümsük küm temadoktsü aser linük ajak nung külemi Parliamentary election agitsü. Küm pezü jakdang Nagaland asoshi Lok Sabha nung amentsü menden ka lemzükja aliba nung amentsü asoshi Neiphiu Rio shimer yok.Iba mapang Neiphiu Rio ya NPF teloki aniba Democratic Alliance of Nagaland (DAN) government nung Chief minister menden nung terakteper shinga mali ayongayonga mena liasü. Ajisüaka, Center nung BJP teloki aniba government nung kilonser menden tajung kabosa angutsü teimla nung  chief minister menden toktsür Center-i  oadok. Ajisüaka, pa nem kilonser menden magütsüba agi temulung masü küm pezü inyaka arur külen, yaküm küm pasasa Lok Sabha tatar menden nungi anen. Pa Lok sabha tatar menden nungi anenba nükjidongji ano Nagaland nungsa aruagi tanaben yimten nung shilem agitsü asoshi liasü. Iba tebilemba nung yimten telok tasenba NDPP nung lenir ser election nung toktep aser takok ngur tang ano Chief minister kümogo. Atangji, pa dak yimten lenitsü sempet aser tashi alinungji, Nagaland nungbo pai mulungba nung yimten anishitetter. Iba ama nisung ka aienba mapang tainer jagi ochishia pei nübortem meima tarutsü lima tajung ka yanglutsü temulungtetba nung inyakra ajak atema tia tajung asütsü. Ajisüaka, pai pasasa Chief minister menden toktsür aoba sülen Lok Sabha nung kümsük küm pongo matemdangyongi ano state-i meyipa aruba ajanga Nagaland nung election talila ka agitsüsa akümba ya ajak atema takoksa tulu lir. Joko, küm ka asoshi asüyonga tokteper asünungji, telok ajaki takok angutsü merangtsü saka tebelem malang asütsü. Shiba shimdir shimaka, küm ka nungji kecha meinyaktettsü, anungji tang yabo tetendanger ka amaidang ser taruba küm kasa mapang nung linük ajunga nung Lok Sabha election külemi agidang toktepbajiang shitakba küm pongo atema tokteper asütsü. Item ajakji yutsür, tang May 28 nü agitsüba election yabo Nagaland ajunga atema Lok Sabha tatar ka shimtsü asoshi dang agitsü alinungji, Nagaland ajunga ya constituency ka dang asütsü, anungji pei pei sasep nung party lenirtemi inyakba dak alaka candidate-bo tesem ajakibo marutettsü. Aji oda, nisung masü saka party mesüra party masü saka tetemsü nisung nem ochishia vote enoktsütsübaji parliamentary election ya asütsü ta bilemer. Candidate-bo ka dang saka constituency-bo state ajunga, anungji alidi asüyonga sen agi vote malitettsü aser yokdi asüyonga talir malitsü. Iba ama election ka nung vote agütsütsü temeten alir senso shiai ochishia pei angatetba party mesüra pei mulungba nisung nem vote agütsüra, Nagaland nung election timi agitsü tetenzüker asütsü. Iba tangatetba aser teimla nung asenok asoshi Lok Sabha election agiba yimya amato state general election-a agitsüsa election agiba yimya nung temelenshi bener arutetra, ibajiang Nagaland nung temelenshi tajung arutsü tenzüker asütsü. Tapu aika jembiyonga tang agiba ama state general election agi tashi Nagaland majungtsü, anungji tang election nung shilem agirtem asenok yabo tarutsü lanur putu raksatsürtem amato dang bilemdi. State nunga süang mesüra oagi center nunga süang yimten yimsüsür akümbaji pei atema rongsen bushitsü akümer masü saka nübortem tenzüktsü aser parnok jenjang tajungba kümdaktsütsü asoshi akümer, ajisüaka sen agi vote alia election nung toktep tashi iba nükjidongji metongtettsü. Iba tangatetba nung asenok ajaki Nagaland nung asen dak apet ‘ Election system’ tasen ka bener arua timi shilem  agitsü bilema parliamentary election nung ya shilem agidi.