Nagaland Governor-i Mokokchung nung tongtibang loktitem ajuru

Dimapur, Monupii 03 (TYO): Chungtia nung Moatsümung amungtsü atema Nagaland Governor, P.B Acharya ya Rasemnü/Wednesday Mokokchung tonga aru aser Mokokchung jila nung tongtibang lokti lenirtem den tanü Yangtepnü ajuru.
Governor-i lokti balala lenirtem den senden amenba mapang ajaki agizüktettsüsa Naga yimten ken o latettsü, zünga meteter mapa mangu aliba lanurtem nem maongka tasen agütsütsü aser entrepreneurship atema lanurtem nem education aser training agütsütsü atema rangloker tanga state tem den kasa jenjang nung asen state terenlok mapatem asendenshia inyaktsü amala onüktem jembi.
Ao Senden, Watsu Mungdang aser Ao Kaketshir Mungdang den senden amenba mapang P.B Acharya-i Naga yimten tebilemtsü tekeratiba nung tatem kati arutsü imlar, ta ashi.
Ao Senden, Watsu Mungdang, Ao Kaketshir Mungdang ajanga Naga nungeri aginüba mangdangtem lemsatepa liasü. Pai Mokokchung Chamber of Commerce tir, Tsukti Longkumer-i anir külem züngsemtem ajuru aser parnok indang tebilemtsütem lemsatep. Parnoki Governor dang lenmang majungba ajanga osettsüset belenshiba nung timtem ajurur, ta metetdaktsü. Lanurtem nem entrepreneurship training agütsütsü ya MCC asoshi olong ka asütsüla, ta Governor-i lemsatep.
Mokokchung Press Club tir, Limalenden-i anir züngsemtemi Governor Acharya ajurua sensaksem ka aka. Yimtsüng balala nung aliba nüburtem nem osang tejangja agütsüba nung tongti shilem agiba atema Ao oshi nung adokba osangkaket, Ao Milen aser Tir Yimyim dang pelaba Governor-isa shisem.
Iba sülen Nagaland Governor-i district nung aliba HOD tem den ADC (Planning) conference hall nung senden ka amen, kong pai tajemzük tia nung aliba nüburtem ajungkettsü mechi centre aser state sorkari teyari balala agütsübatem ketdangsüa amshiba osang agia liasü.
Iba senden nung education indang jembiba mapang, nijai lapokba school tem nung azüngtsü makoker sensakertem timba sorkari lapokba school tem nung azünger, aser parnok jenjang ajungkettsü atema tesayurtemi bendanga agütsür inyaktsüla, ta Governor-i ajungshi.
Mokokchung nung lokti lenir balala den sensaksemba mapang P.B Acharya-i, “Nenok Khristan ka asüba asoshi nenok tejak tenteter, nia Hindu ka asüba asoshi tejak tenteter. Tamangba yimsü ya nisung ka tajungba kümdaktsütsü asoshi nija atema asütsüla,” ta nenshia ashi. HoD tem senden ya Additional Deputy Commissioner, Mokokchung, W. Manpai Phom-i ketdangsüa agi.