PDA sorkari tesayurtem tebilemtsü atema inyaktsüla: ANSTA

Kohima, Monupii/May 03 (TYO): All Nagaland School Teachers Association (ANSTA)-i PDA sorkar dang SSA tesayurtem nem itasen magutsüi aliba aser adhoc tesayurtem regularization onük ya kanga tongtibang süa inyakdaktsüner ta mepishiogo.
Kodang tesayur tentet kari longkak ait tenzükdir, ibaji ajanga kaketshirtem akoksar aser tai maket kaketshirtem timtemer, ta ANSTA tongti tezülur, Visato Koso aser Tir, Ponchulo Wanth nati sangdong ka nung metetdaktsü.
“Nija school tem ama masü saka sorkar school aika assembly election agiba ajanga 2018 küm academic session menor ang tenzük, kechiyong sorkar school aika nung training agi, polling stations aser security anenzüktsü atema agia liasü; iba sülen HSLC aser HSSLC tatidang agi, ibayongji exam centre school tem nung class magiteti aruogo. Anungji longkak aitba sentong ayongzüka agira kaketshirtem kanga mejungi kongshitsü,” ta sangdong nung shia lir.
“Tang aliba PDA sorkari election manifesto nung nangzükba rongnung parnok sorkar tashii arura tesayurtem itasen magutsüi aliba agutsütsü ta nangzükogo. Tang parnok sorkar tashi nung lir, anungji parnoki nangzüka aliba ama tesayurtem nem itasen agutsütsü imlar,” ta ANSTA-i metetdaktsü.
Association-isa sorkar dang, adhoc tesayur 1166 regularization atema P&AR, Finance, Screening Committee nungi clearance nguogo aser cabinet-i agizüktsü dang atadar; anungji cabinet senden tekaraba nung mena iba proposal ji agizüktsü metetdaktsür, ta ashi.
Ano külen, adhoc primary tesayurtem itasen 6700 aser graduate tesayurtem itasen 8400 fixed süogo, aser ibaji parnok school tem nung Peon/Chowkidar itasen dang nungia kanga tajemba lir, ta ANSTA-i metetdaktsü.
Item kulitem nung ajemdaker tesayurtem tenüng nung Association-i Progressive Democratic Alliance sorkar dang department-i shisaliok tajung agutsütettsü aser maparen ajak tiptema inyaktettsü atema tesayurtem tebilemtsü onük atema kanga tongtibangsüa inyakdaktsüner, ta ANSTA-isa mepishia metetdaktsüogo.