Tatitang nung metsüktsü aser malangtsü kümdanga lidi

– L.Kika Pongener.

Mathi-26:41. “Tatidang nung metsüktsü nenoki saksalemang aser sarasademang”. Khristan taküm nung temenen tatidang ya, Khristan taküm ka koba anogo nung temulong meyiper, Yisu Khristaji kü Kibur aser Kümtetdakba ta agizüker, taküm tasen ka tenzüka aor, iba anogo nungjagi kodak matong tashi temenen tatidangji ajurujen ajuruyonga aotsü. Mojing jagi pa tebilemba matong tashi aser takok matong tashi merangjen merangtsü. Anungji Khristan taküm ka anogo shia item mojing tatidang nung metsüktsü asoshi sarasadem nung akang-akanga alitsü aser saksalema alitsü indang, Yisui Pa nütsüngtem dang ashiba asenoki laishiba nungji angur. Lipok nung Eden-tsüki nung Satan-i Eve atidang. Mezüngbuba Eve dangi arua Satan-i ashibaji, atsüki tiyong nung aliba koba süngjang Tsüngremi techi ta ashi, nenoki aji chirabang, nenok Tsüngrem ama tajung o tamajung meteta akümtsü. Alima nung shibaibo Tsüngrem amai mekümnutsü…??? Anungji iba mojing tatidang nungji Eve-ji tsükadok aser la kinungbu Adam-a dena tsük. Tanabuba nung iba küsa Satan yagi Yisu Khrista tzü nung baptir külen anogo lir aser aonung lir arem nung lumia senzüa alidang, Yisu-a chiyungtsü agisa atidang. “Na Tsüngrem chir süra, item lung yagi am kümer chiang”. Tanabuba nung Satani Yisu Tenlaki kilem kolaki anir tur mendaktsü, aser yang nungi tsükang. Aser nebui kodak tenyartem yoka na kümzüktsü. Aser ano tasemben Satani Yisu tenem kanga talang kati anir tur, Yisu dang alima chuba yimlitem sayu, aser nai ni aputaka külemra ni ne nem item chuba yimlitemji agütsütsü ta ashi. Eve tang sungjang ya chira, nenok Tsüngrem mesüka akümtsü ta ashi. Yisu dang Na Tsüngrem chir süra, tetezü na Tsüngrem süra…lung yagi am kümer chiang. Eve dang Tsüngrem ama akümtsü ta ashi…Yisu dang na Tsüngrem chir süra ta ashi…Alima nung Tsüngrem ama mekümner aser Tsüngrem chir mesüner shiba alitsü ? Ajisüaka, Yisui kechi langzü..??? “Nisung am tesa agi taküm malir, saka Tsüngrem bang nungi adokba o shia agi dang taküm alir”. Ano tanaben Yisui Satan dang ashi, ” Nai Kibuba ne Tsüngrem tatidang”, tasemben Yisui Satan tang ashi, “Mojing ni nungi aeinshiang”. Yisu anogo lir aser aonung lir tashi arem nung yaseta nemzür asünungji Satani chiyungtsü agi atidangba nungji Yisu-ji tsüktsü südi ta bilem. Ano iba putu mapang ya par Yihuda nunger Rom yimli chuba tesashi yimsüsüba kübok timtema aliba tensa ka asünung, item chuba yimli agütsütsü ta sayuba nungji Yisuji tsüktsü ta bilem südi, saka item ajunga nungji Satani tamakok angu.
Iba küsa Satan yagi taküm February ita nung asen Aor tamanger tajungtem aika sen nung, sübokrem nung, ochimashi mapatem nung alangdaktsütsü aser aibelendaktsütsü asoshi mesuzüka atidang. Iba Satan yagi asen Aor-i sen kanga meimer-a ta jungjunga lazük südi…Clean Election…Clean Election ta Aor-i tamasa ayimokja tenzük. Iba Satan yagi ni tamasa Aor yimsüsür aser Tsüngrem tenzükertem nungi shir lanu-laja ajak dangi odi aser sen agi atidangdi ta ser apuso asütsü, ajiser Aor tamanger tajung aika sen nung alangdaktsü. Iba Satan yagi Eden-tsüki nung Eve mesuzükba ama-to aser Yisu mesuzüktsü merangba ama-to, Aor lennir nübo tajung ajunga dangi pei pei dak apet tanganutsü o tanang yanglur mesuzükyonga ao. Tashitemeteter, o junga jembiteter, o nung temo-tesola sempet alirtem kar dangi orr… Hai lennir tajung, na o nung sempet tajung tangar attsür arutsü ain keta lir, anungji Candidate kar dang ni na atema voters aika mesuzüka anir arutsü, kü nem sen lakh ishika agüjang, ta ser meshiang…Ajiser senji meshizüker, nisung ishika nem tera-ra lema agütsür, tiyazü bill yanglua sayur, tanüngba senji na agiangma…Yimsüsür tazüngpur Gaon-bura kar dangi orr… Hai yimsüsür tulur,.. jungaka mejungaka, tanü tashibo iba yimtsüng tashi nai amma lir…Candidate kar dang, yimsüsür ajunga ne kapu nung lir ta ser…sen lakh ishika meshiang aser terara lema agütsür tanüngbaji na agiangma… Ano Chitentzür tu-warak kar dangi orr… Hai Watsüla nabo kanga-sa tesangra aser numa kanga tadang ato… Candidate kar dangi orr… ner medemsor ishika ayongteper proxy vote agütsütsüa ta ser sen lakh ishika meshir lema agiang… Ano Kiyim lanur nübojung kar dangi orr… Hai Wabong tajung, tang tashitait mapang kechiba kidang mena kazütsü…
Nenok lanur nisung ishika ayongteper, Candidate kar dang Polling station ka coup sütsütsüa ta ser sen lakh ishika meshir lema agiangma…Kechiba ajem-ajema alir..??? Tang ya memeshira kodang meshitsü…Tang ya mebendenra kodang bendentsü…??? Ano Deacon, Mapangser, Tenzükla, Counsellor, Evangelistic Committee aser Sarasadem telok kar kibong dangi, Party worker kar Canvassing arur…Hai Tenzüker & Tenzükla tajung, ner-a ozü party nem vote agüjangma…aser iba sen yagi aon danga alia chiang, aser tanür school fee danga agüjang… mesüra kidang nüngdak osettsüset kar danga aliangma hiii… Ayaaa…!!! Haija… Onoki küla küang ta-bo memeshir ako… Ajisüaka nenoki agütsürji oda agilabaaiii…Yamaji iba Satan nem ya Aor tamanger tajung aika mesüzükdaktsüogo, shingaia nunga ta meshitettsü südi.
Election senji aseni küang ta meshir agiyongjia mesüra tangari ner-a tera agiang ta ser agütsüba meshia agiyongjia tagiji tagi. Ajunga sakü dang election temenen tatidang nung tsükogo. Yisu-ibo Satani item lung yagi am kümer chiang ta mesuzükaka “Nisung am tesa agi taküm malir ta dang tasü itta langzü”. Ajisüaka asenokibo “Nisung sen agi dangbo taküm malir ta tasü itta melangzütet”. Yisui Satan dang ashibaji, “Nisung am tesa agi taküm malir, saka Tsüngrem bang nungi adokba o shia agi taküm alir”. Ashiko Tsüngremi tangsa ne taküm tangola ne dak nungi agientsü ta shira, asenok idangjisa tembanga-adoktsü. Tsüngrem bang nungi adokba o agi dang taküm ya alir ashi, sen, rongsen, chiyungtsü, aben-süoshi aser senti osettem agi nisung taküm malir. Yihuda nunger dang Hagai ainkari shinba o ka bilemteter. Hagai-1:5-6.”Yamai temeranger Kibubai ashir, Nenoki jenti prok saka tera dang bena aru, nenoki chiyunger saka nenok tebok masünger, nenoki ajemer saka tzüra matemer, nenoki süoshi abener saka shinga talembo mali, aser shibai sen aar juli tapok nung inoktsü aa arur”. Election nung sen aika meshidena bendena yur, iba sen ajungaji hospital kar nung indokmara…juli tapok nung inoker masü noo…??? Election sen agi yangluba ki nung anisungzüka lidi ma…??? Election sen agi aliba gari nung sadoksadoka mener senzüdima…??? Ashiko iba rongsenji tangar kar asentzü sena timtemseta meranga inyaker bendenba rongsen asütsüa akok..??? Aser pei shi nung wahzüker amai shishia agütsür asütsüa akok…!!! Iba senji nangnanga agitsü no…??? Aji oda, shir südir süaka asentzü sena belemseta meinyaki züba-zübaa bendenba rongsen süra…Ashiko iba rongsenjia…ajioda, mopung nung…tazüngla nung… amajok nung dang indoktsü Tsüngremi lenmang lapoktsür sülabaa…Tsüngrem o-i ashir, “Anüng kübok tejashitsü ka ni nguogo, oda rongsen kiburi ayubaji pa timtemtsüang, aser item rongsenji tamajung kar agi samatsür”. (Sayu-5:13-14). Aji oda, angadi züba-zübaa asentzü meseni mebelemi bendenba rongsenji amajok nung, mepong nung, tazüngla nung dang indoktsü.
Temeim tamanger tajungtem, Tsüngrem o-i ashir, “Ajungben anguba rongsenji ajema akümtsü; saka züsenba agi terara shibai bendendir aji züintsü” (A.Shin-13:11). “Timtem keter rongsen tulu akaba dang nungi, Kibuba tsübuba den tera akaba tajungba” (A.Shin-15:16). “Kodang oset züindir tachirtema renloker, aser tenük agi reprangba dak alaka kiburji kechi tajangzük ali ? Tila ka dang chiaka, tulu ka chiaka, aluyimer ayip janga mejanger, saka takar moshia akayongbo pa ayip majanger” (Sayu-5:11-12). “Rongsen tulu dang nungi tenüng tajungang shimtettsüba; Hon aser taribi dang nung-ia maongka tajungba” (A.Shin-22:1). Sen teraka meshia agir, masü tashi oda alima mesama tashi asen jakla yoka achiba tang nungibo, ochishia indang-indanga aliba-ang tajungba, aser alima mesama tashi tenüng tajung maongka aazüka ayuba-ang tajungba. Tsüngrem o-i ashir, Nenok taküm asoshi nenoki kechi achitsü, mesüra kechi ajemtsü ta shisa tebulu ta ashi,
Anüng ozütem ajiang parnoki marur madener mesüra jendang mebendener, saka nenok kodaker Tebui parnok mesur. Arem nung labu naro koda ainer shisadangang, parnoki meinyaker aser ang mainer. Saka, O ! tera amangertem kechi arem ayi tanü lir asüngbo mimung nung enoktsü, item nem-jia Tsüngremi yamaji abendaktsür süra, Pai nenok nem mabendaktsütsüa ma…??? (Mathi-6:25-30). Temeim tamanger tajungtem, asenoki meromorua, tiyazü agi tangar külakokj rongsen mebendenaka, asenoki dang ochishia meranga inyakra, Tsüngremi tanü poksüngbosa moatsütsü. Anungji sen ishika meji, chiyungtsü tilaka meji taginutsü osettsüset kar meji mojing tatidang nung metsüktsü kümdanga mita lidi.